Өвлийн дүн хүйтнээр хувийн эрх ашгийн төлөө цэцэрлэгийн дулааныг тасалжээ

Улаанбаатар хотод нэн тэргүүнд тулгамдаад байгаа асуудал бол хүүхдийн цэцэрлэг. Төрөлт нэмэгдэж, эцэг эхчүүд хүүхдээ цэцэрлэгийн бараа харуулах гэж хонон өнжин дугаарлаж байгаа нь хэний ч нүдэнд илхэн байдаг. Гэтэл хүүхдийн цэцэрлэгийг “эсэргүүцэх” нэгэн бас байна. Хан-Уул дүүргийн нутаг дэвсгэрт үйл ажиллагаагаа явуулж байсан “Crystal 21” цэцэрлэгийн халаалтыг өчигдөр “Улаанбаатар дулааны сүлжээ” ТӨХК-аас тасалсан байна. Идэр есийн хүйтэн эхлээд гурав, дөрөвхөн хонож байхад балчир хүүхдүүдийг дулаан цэцэрлэгтээ нойрсож байхад нь “Мэргэжлийн хяналтын зааврын дагуу” гэдэг шалтгаанаар ийнхүү тасалсан гэнэ. Манай сурвалжлах багийнхан тус цэцэрлэг дээр очлоо. Гадаад тохижилтоосоо л хүүхдийн ертөнцийг харуулсан нь гадна ханан дээрх хүүхэлдэйн баатруудын зургийг товойлгон зурсан байдлаас ажиглагдана. Биднийг цэцэрлэгийн үүдээр оронгуут л цэцэрлэгийн эрхлэгч С.Мөнхцацрал үүсээд байгаа нөхцөл байдлыг ярьсаар угтсан юм. Түүний хэлж байгаагаар хүүхдүүдийн өдрийн унталгын цагаар “Улаанбаатар дулааны сүлжээ”-гээс хоёр мэргэжилтэн ирээд “Мэргэжлийн хяналтын газраас тасал гэсэн” хэмээн дулааныг нь тасалсан гэнэ. Энэ цэцэрлэг өнгөрсөн аравдугаар сард ашиглалтад орж үйл ажиллагаагаа явуулж эхэлсэн бөгөөд цэцэрлэгийнхээ дулааныг хажууд байрлах “Orange town” хотхоноос татдаг юм байна. Харин “Улаанбаатар дулааны сүлжээ” ТӨХК-наас тус хотхоноос дулаан татахдаа зөвшөөрөл аваагүй тул иргэдээс санал авч байж дулааныг нь цаашид өгөх үгүйг нь шийдвэрлэнэ гэдэг мэдэгдэл ирсэн аж.

Хотхоны оршин суугчидаас санал авахад нэг хүнээс бусад нь зөвшөөрчээ. Ганцхан Алтан-Очир гэгч л эсэргүүцсэнээс болж СӨХ-ны дарга зөвшөөрөл өгөх боломжгүй болсон байна. Алтан-Очир гэх иргэн ганцаараа энэ байдлыг нь хүлээн зөвшөөрөхгүйгээр барахгүй МХЕГ, “Улаанбаатар дулааны сүлжээ” гэх мэт байгууллагуудаар явж заргалдсаны эцэст санасандаа хүрч чадсан нь энэ аж.

Цэцэрлэгийн ажилтнуудын хэлж байгаагаар “Orange town” хотхоны иргэн Алтан-Очир нь хотхоны хажууд өөрөө барилга барьж байгаа сураг сонсогдсон гэнэ. Ямар шалтгаанаар бяцхан үрсийн хоёр дахь гэр болсон цэцэрлэгийг нь эсэргүүцэж байгаа нь сонин. Гэтэл “Улаанбаатар дулааны сүлжээ” ТӨХК нь ч мөн адил тэрхүү цэцэрлэгт сурч боловсорч, өсөж торниж байгаа 100 гаруй хүүхдийг бодолгүй ганц иргэний эсэргүүцлийг тэр дор нь шүүрч авч дулааныг нь тасалж байгаа нь цаанаа ямар нэгэн холбоо сүлбээтэй юм болов уу ч гэж бодогдмоор.

Уг нь цэцэрлэгт ирсэн мэдэгдлийн дагуу 12 дугаар сарын 26-ны өдөр дулааныг нь тасална гэж заасан. Гэтэл тэд ажлаа хэтэрхий сайн хийдэгийнх үү? Эсвэл аль нэг даргын яаралтай тушаал ирсэн үү? Ямартай ч “болзсон” хоногоосоо нэг өдрийн өмнө тасалсан нь энэ аж. Тус цэцэрлэг азаар шалны цахилгаан халаагуураар нэмэлт дулаан авдаг байснаар унтаж байсан хүүхдүүд энэ өдөртөө дааралгүй гэртээ харисан юм. Ес эхэлж, өвлийн ид хүйтэн тачигнасан энэ өдрүүдэд дулаангүй хүүхэд битгий хэл байшин ч тэсвэрлэхэд бэрх. Тиймээс энэ олон бяцхан үрс цаашид цэцэрлэгтээ явах үгүй нь хувийн сонирхолдоо хөтлөгдсөн гэх ганцхан Алтан-Очир гэгчээс шалтгаалах болоод байна. Хамгийн хэрэгтэй хүүхдийн цэцэрлэгийн хаалгыг хаахад хүргэсэн Алтан-Очир гэгч хэн бэ?, Ямар шалтгаанаар ийнхүү өлөв, долов хийж явна вэ?

Дүн өвлөөр хүүхдийн цэцэрлэгийг хөлдөөж байгаа асуудлыг зохих байгууллага нь анхааралдаа аваасай. 

Ж.Уранмандал