Тансаг даашинзны урлан B&B брэндийн түүх

“B&B” брэндийн үүсгэн байгуулагч Батзул бизнесийн гараагаа хэрхэн эхэлсэн талаар сэтгэгдлээ хуваалцлаа. Залуусын дуртай брэнд үүссэн түүх, залуу хосуудын эхлүүлсэн бизнесийн тухай яриа танд урам зориг өгнө гэдэгт найдаж байна. 

Намайг Батзул гэдэг. Одоогоос нэг жилийн өмнө нөхөр бид хоёр нэлээд тээнэгэлзсний эцэст зориг шулуудан, энэ бизнесээ эхлүүлж байлаа. Би багаасаа өөрөө хувцасны загвар гаргаж, түүнийгээ цаасан дээр буулгах дуртай, өөрийнхөө хувцсыг янзалж, өөрчилж өмсөх дуртай охин байсан. Ирээдүйд тэр хоббигоо бодит болгох чин хүсэлтэй байсан. Одоо ч гэсэн өөрөө зурсан, дэвтэр дүүрэн  "царай муутай" хүүхнүүд бий. Загвар зохионо, зохиосон загваруудаа өмсөж, модель болно гэдэг бол миний хар багын мөрөөдөл. Гэвч цагийн аясаар дуртай зүйлээсээ хөндийрч, бараг мартах шахсан байсан. Өөр ч мэргэжил сонгосон.

Дөрвөн жилийн өмнө би хайртай залуутайгаа учирсан. Түүнийг минь Батболд гэдэг. Тэр маань их авьяастай. Нууцлаг гэмээр авьяас нь юу байсан гээч. Оёж шидэх хүсэл мөрөөдлөөс өөргүй намайг бодвол хайртай залуу мань мэргэжлийн биш атлаа маш сайн оёдолчин байсан. Багаасаа ээждээ тусалсаар гарын дүйтэй, уртай болсон. Ээжээсээ бүгдийг сурсан гэж ярьдаг. Эрэгтэй хүн байж тийм ч юм оёдог, ийм ч юм оёлоо гэхэд нь би битүүхэндээ гайхаад л өнгөрдөг байсан. Анх бол бүр мэдээгүй, ийм авьяастай гэж итгээгүй гээд бод доо.

Гэтэл нэг өдөр  надад зориулж шинэ жилээр өмсөх даашинз урлаж өгөхөөр болов. Би гаднаа тоглож байгаа байх гэж бодсон ч дотроо маш их баяртай байлаа. Найз залуугийнхаа урласан даашинзыг өмсөнө гэхээс итгэж ядан хүлээсэн. Шинэ жил боллоо, даашинз маань ч бэлэн боллоо. Би хараад өөрийн мэдэлгүй дуу алдсан. Миний даашинзыг найзууд маань, ер нь харсан хүн бүхэн гоёыг нь гайхаад л... Хамгийн аз жаргалтай шинэ жилийг би тэгэхэд мэдэрсэн. Ингээд энэ үеэс хойш би нөхрөө дэмжиж, түүнийхээ чадварыг хөгжүүлэх тухай бодох болсон.

Нөхөр маань миний багын хүслийг мэддэг болсноосоо хойш заавал мөрөөдлийг нь биелүүлнэ гэж урам өгдөг байсан. Тэр минь амласандаа хүрч, миний мөрөөдлийг биелүүлсэн. Бид  хамтдаа мөрөөдлийнхөө төлөө ямар нэгэн зүйл хийж эхлэе гэдэг дээр шууд л санал нэгдсэн. Олон удаа бодож төлөвлөснийхөө үр дүнд бүсгүйчүүдэд зориулсан даашинз урладаг B&B (Батзул ❤ ️Батболд ) брэндээ өлгийдөж авсан. Өөрсдөө бүтээж чадсан.

Бүхнийг тэгээс эхэлж, оёдлын машин авахаар мөнгөө цуглуулж байсан маань саяхан мэт санагдаж байна. Хүйтэн өвөл, халуун нартайд ч халууцах, даарахаа мартан, хүргэлтдээ хоёулаа гүйдэг байлаа. Гэхдээ үргэлж хамтдаа байсан болохоор тэр бүхнийг бэрхшээл гэж ер бодоогүй ээ. Энэ хугацаанд нэг зүйлийг ойлгосон. Хүн аливаа зүйлийг эхлэхдээ яах бол ийх бол гэж айх биш харин ч өөртөө зориг өгч, тэр замаараа шантралгүй цааш алхах нь хамгийн том жаргал юм байна. Болгоомж, айдсыг зүгээр л мартах хэрэгтэй.

Анх шантрах, бухимдах, гуниглах үе (Би бүр уйлдаг байлаа) цөөнгүй байсан ч нэг нэгнийгээ зоригжуулж, урам өгч, хурцалж байсан минь бидний амжилтын эхлэл байжээ. Магадгүй бидний хайр бидэнд өөрсдөд маань маш их хүч өгсөн байх.

Одоо бид ур чадварын хувьд өдөр өдрөөр ахиж, брэндийн нэр хүнд, үйлчлүүлэгчдийн маань хүрээ улам өргөжиж байгаа. Эрэгтэй хүн ямар нандин мэдрэмжтэй байдаг гээч. Би нөхрийнхөө шүтэн бишрэгч. Би түүнээсээ эсгүүр, оёдол, загвартай холбоотой бүхнийг сурсан. Нөхөр маань урлана. Би загварын анхны өмсөгч нь болно. Тэр маань бас зурагчин хийнэ. Ингээд бодохоор би багынхаа мөрөөдлийг бараг л биелүүлсэн. Надад тэр боломжийг хайртай залуу маань өгсөн. Бид хоёр үргэлжлүүлэн мөрөөдсөөр л байгаа. Брэндээ дэлгүүртэй болгох нэг мөрөөдөл нэмэгдсэн. Мөрөөдөл + Зорилго. Бид хоёр хичээнэ ээ. B&B-г сонгодог бүсгүйчүүддээ баярлалаа.