Капитал болон бусад банк халамжийн мөнгө олгохоос ТАТГАЛЗСАН гэв

2019 оны нэгдүгээр сарын Нийгмийн халамжийн мөнгөө авах гэсэн иргэд Төрийн банкинд олноороо дараалал үүсгэж буйтай холбоотойгоор тус банкны зүгээс мэдэгдэл гаргасан байна.

Мэдэгдэлд “2019 оны нэгдүгээр сарын Нийгмийн халамжийн санхүүжилт Төрийн банкинд орж ирээгүйгээс үүдэн Төрийн банкны салбар нэгжүүдэд халамжийн мөнгө хүлээсэн иргэд дараалал үүсгэж байна. Дээрх үүссэн нөхцөл байдал нь Төрийн банкнаас шалтгаалаагүй бөгөөд санхүүжилт орж ирсэн даруй иргэдийн халамжийн мөнгийг олгоход бэлэн байна.

Мөн Капитал банк болон бусад банк халамжийн мөнгө олгохоос татгалзаж байгаа тул нийгмийн халамжийн санхүүжилтийг иргэдэд хүргэх үйлчилгээг Төрийн банк дангаараа үзүүлж байгаа нь ачаалал эрс нэмэгдэх шалтгаан болж байна.

Иргэд та бүхнийг банкны салбарт удаан хүлээлгэхгүй байх зорилгоор Төрийн банкны www.statebank.mn цахим хуудсаар болон www.facebook.com/StatebankMN/ фэйсбүүк хуудас, Гялс банкны аппликейшнээр дамжуулан аль дүүрэгт, ямар халамж орсон талаарх мэдээллийг тухай бүр нь хүргэнэ” гэж мэдэгджээ.

Тодотгоход, Нийгмийн халамжийн санхүүжилт нь:

-Нийгмийн халамжийн тэтгэвэр

-Нийгмийн халамжийн тэтгэмж

-Нийгмийн халамжийн үйлчилгээ

-Нийгмийн хөгжлийн үйлчилгээ гэсэн төрлүүдтэй байдаг.

• Халамжийн мөнгө хугацаанаасаа хоцорч, иргэдийн дунд хүлээлт үүсгэдэг жишиг бий. Харин Төрийн банкны зүгээс өгч буй мэдээллээр   Капитал болон бусад банк халамжийн мөнгө олгохоос татгалзаж байгаа гэдэг нь шинэ мэдээлэл болж байна. Гэхдээ энэ бол Төрийн банкны мэдээлэл гэдгийг тодотгоё. Бусад банкууд халамжийн мөнгө олгож байгаа эсэх талаар тодруулан мэдээлнэ.
  

УИХ-ын гишүүн Б.Ундармаагийн Капитал банк ЖДҮ-ийг хөгжүүлэх сангийн зээлтэй холбоотой асуудлаар нийгмийн анхаарлын төвд орж ирээд буй энэ үед халамжийн мөнгө олгохоос татгалзсан гэх мэдээлэл гарч байна. Капитал банкны зүгээс татгалзах хүсэлт гаргасан уу, эсвэл тийм шаардлагыг холбогдох байгууллагын зүгээс тавьсан уу гэдэг асуудал анхаарал татаж байгаа юм.