Н.Ганбямба: Чингис хааны нутаг Дадал сум руу авто зам тавина

- ЗАСАГ ДАРГА ЯРЬЖ БАЙНА -

Хэнтий аймгийн Засаг дарга Н.Ганбямбатай цөөн хором ярилцлаа.

-Өнгөрсөн онд Хэнтий аймагт бүтээн байгуулалтын ажил хэр өрнөв. Энэ жил улсын болон орон нутгийн төсвөөр хэчнээн барилга байгууламжийг шинээр барихаар төлөвлөж байна вэ?

-Хэнтий аймагт өнгөрсөн онд 50 орчим тэрбум төгрөгийн бүтээн байгуулалтын ажил өрнөсөн сайхан жил өнгөрлөө. Тухайлбал, аймгийн төвийн хуучирч муудсан бүх барилгыг акталсан. Үүнтэй зэрэгцээд шинэ барилгын ажлыг эхлүүлж өнгөрсөн ондоо багтааж ихэнхийг нь хүлээлгэж өглөө.

Жишээ нь, аймгийн Стандарт хэмжилзүйн газрын барилга 1958 онд ашиглалтад орсон байдаг. Харин саяхан шинэ барилгатай болсон. Мөн Татварын албаны барилгыг шинэчилсэн. Аймгийн Тээврийн точвооны барилгыг шинээр хүлээж авлаа. Ер нь, нийгэм болон соёлын газрын барилгуудыг бүрэн шинэчилж дууссан гэхэд болно.

Үүнээс гадна цэцэрлэг, спорт заал, сумдын төрийн албаны барилгуудыг бүрэн шинэчилж байна. Энэ онд орон нутаг, улсын төсвөөс 60 гаруй тэрбум төгрөгийн бүтээн байгуулатын ажлыг хийхээр төлөвлөж байгаа.   

Хэнтий аймагт Чингисийн ордон цогцолборуудыг барьж, дуусгахаар ажиллаж байна. Заримынх нь бүтээн байгуулалтын ажлыг эхлүүлчихсэн явна. Чингис хааны төрсөн нутаг болох Дадал сум руу шинэ авто зам тавина. Энэ ондоо багтааж 20 орчим км замыг нь тавьчих байх. Мөн Бор-Өндөрөөс Даланжаргалант сум хүртэлх авто замын ажлыг эхлүүлэхээр төлөвлөөд байна даа.

Хэнтий аймагт 60 гаруй тэрбум төгрөгийн бүтээн байгуулалтын ажлыг хийхээс 50 орчим тэрбум төгрөг нь улсын төсөвт суусан. Үлдсэнийг нь орон нутгийн төсвөөс гаргана. Мөн Азийн хөгжлийн сангаас дөрвөн сая ам.долларын цэвэрлэх байгууламжийн бүтээн байгуулалтын ажил хийгдэнэ. Дэлхийн банкны найм орчин тэрбум төгрөгийн санхүүжилтээр өндөр хүчдэлийн шугамыг бүрэн шинэчилнэ. Айл өрхүүдийг гурван тарифт тоолуураар хангах ажлын хүрээнд эдгээр өндөр хүчдэлийн шугамыг бүрэн шинэчлэх юм.

Аймгийн цэвэрлэх байгууламжийн ажил эхэлж байна. Энэхүү ажилд орон нутгаас 700 гаруй сая төгрөгийг зарцуулах юм. Өнгөрсөн жил түүхэндээ анх удаа мал сүргийн тоо дөрвөн саяд хүрлээ. Энэ жил 4.6 сая толгой мал тоолуулсан. Мал сүргийн тоогоороо улсын хэмжээнд анх удаа гуравдугаар байрт орлоо. Өмнөдэлгэр сум бусад сумаасаа хамгийн их мал тоолуулсан. Улсдаа тэргүүлсэн гэж ойлгож болно. Гэхдээ бид тооноос илүү чанарт анхаарах ёстой. Үүлдэр угсааг нь сайжруулж, малаа чанаржуулах хөтөлбөрийг аймгийн хэмжээнд хэрэгжүүлж эхлээд байна.

-Өвөлжилт хэр байв. Мал сүргийн тоо хэдэд хүрэв. Хэр хатуу хавар болно гэж харж байна вэ?

-Өвөлжилт харьцангуй гаагүй байлаа. Гэхдээ харын зуд болоход ойрхон байна. Мал, амьтан ундны усгүй болох эрсдэл бий. Энэ байдал нь хавар малчдад сөрөг нөлөө үзүүлэх аюултай. Гэхдээ аймаг, орон нутагтаа хаваржилтын бэлтгэл ажлыг бүрэн хангасан болохоор мал бага хорогдох байх гэж найдаж байна. Хэнтий аймагт оторчдын 500 мянга орчим тоо, толгой мал байдаг. Тэгэхээр ойролцоогоор таван сая толгой мал манай аймагт өвөлжилж байна гэхэд болно.

ДЭЛГЭРЭНГҮЙГ ВИДЕО ХЭСГЭЭС ҮЗНЭ ҮҮ!