ДОРНЫН ЗУРХАЙ: Мэргэ тавих, идээ, хувцас олоход сайн

Хаврын тэргүүн улаан бар сарын гурван хөх мэнгэтэй цагаан туулай өдөр

-Аргын тооллын 2 сарын 12. Мягмар (Ангараг) гараг / 2019 /

-Билгийн тооллын шинийн 7,

-Өдрийн нар ургах/шингэх цаг: 08:04-18:09
 
-Үс бүү засуул билгийн өдөр нь муу, хэл ам, хэрүүл тэмцэл ирэх

Тухайн өдөр хулгана, луу, могой, морь жилтнээ аливаа үйлийг хийхэд эерэг сайн. Харин нохой, бич, тахиа жилтнээ сөрөг муу. Газар усны үйл, дайнд ялах, дайсан дарах, номхтгох, цэргийн ба догшин үйл хэрэг, худалдаа хийх, балгас эвдэх, шинэ ноён тавих, захиран тушаах, ном айлтгаж заалгах, дээдэст бараалхах, буяны үйл хийх, зэтгэрийг номхтгох, шүтээн босгох, тооцоо хийх, мэргэ төлгө тавих, идээ, хувцас олох, өглөг өгөх, хөрөнгө цацах, эдийн тэнгэр тахих, шид бүтээл үүсгэхэд сайн. Цэрэгт мордох, онгоц, сал, модон тээрэм урлах, гүүр барих, хануур төөнүүр хийлгэх, газар малтах, оёх шидэх, эсгэх, эм найруулах, замд гарах, бэрийн үйл, үхэгсдийн үйл, анд нөхөр бололцоход муу. Эр хүн хэрэг чирэгдэлд холбогдохоос болгоомжилж явах ёстой. Хүн мал амгалангүй тул хичээн сэрэмжлэх хэрэгтэй. Түшмэл, хутганы өдөр дэлгэрдэгч хутга бүү хурцал. Өдрийн сайн цаг: Луу(07:40-09:40), могой(09:40-11:40), бич(15:40-17:40), тахиа(17:40-19:40),  гахай(21:40-23:40), бар(03:40-05:40) болой. Хол газар яваар одогсод хойш мөрөө гаргавал зохистой.