“БИ НАР” гэр бүлийн кино ба нийгмийн хариуцлага

Техник технологийн дэвшил, цаг хугацааны үечлэл өөрчлөлтийн үйл явц, гэр бүл тэр тусмаа хүүхдийн харилцаанд хэрхэн нөлөөлж байгааг өгүүлэх “Би нар” гэр бүлийн уран сайхны кино маргааш /2019.04.05/ нээлтээ хийж, олны хүртээл болно.

Кино хэд хэдэн онцлогтой. Юун түрүүн энэ бол гэр бүлийн уран сайхны кино. Сүүлийн үед өсвөр насны хүүхэдтэйгээ үзэх кино, уран бүтээл ховордсон. “Би нар” кинонд жишээ нь гэр бүлийн салалт, хүчирхийлэл, сэтгэл эмзэглүүлэм зүйлс огт гарахгүй. Тиймээс та хайртай гэр бүл, хөөрхөн хүүхдүүдтэйгээ киног үзэх боломжтой.

Хоёрдугаарт, киноны найруулагчаар Ж.Сэнгэдорж ажилласан. Тэрээр уг киногоор 1990 оноос хойших Монголын нийгэм, соёлын амьдралд гарсан өөрчлөлт бидний ахуй, амьдралын хэв маягт хэрхэн нөлөөлж байгаа ялагуяа техник технологийн хөгжил, цахим орчин, компьютер тоглоомын хор хөнөөл бидний хойч үе хүүхэд багачуудад хэрхэн нөлөөлж байгааг том утгаараа гэр бүлийн харилцааны чухал чанар, үнэ цэнийг гурван бүлгээр хүмүүст харуулахыг зорьсон гэлээ.

Гуравдугаарт, киног Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын санаачилгаар кино багийн уран бүтээлчид  хамтран нийгмийн хариуцлагын хүрээнд бүтээсэн байна. Өөрөөр хэлбэл төр, хувийн хэвшил хоёр бодлогын түвшинд хамтран ажиллаж, соён гэгээрүүлэх үүргээ биелүүлжээ. Тиймээс нээлтийн өдөр “Би нар” киног “Өнөр бүл” хүүхдийн төв, Лантуун дохио ТББ-ын дэргэдэх “Ид шидийн орон” хүүхэд хамгаалал хөгжлийн төв, “Зөв амьдрал” ТББ болон зарим асрамж халамжийн төвийн хүүхдүүдэд үнэгүй үзүүлж, гарын бэлэн өгөх аж.

Кино бол нөлөөллөөрөө бүх урлагийн дотороос хамгийн хүчтэй нь. Солонгосын соёл, аж үйлдвэрийн сурталчилгааг бараг дан ганц кинонууд нь хийдэг байх жишээний. Манай улсын тухайд социализмын үед төрийн бодлогоор кино хийдэг байв. Соёлын бодлого энэ хандлага эргэн сэргэж буй нь талархууштай.