ОЛОН ӨНГӨ | Автобус

Б.Амирдаа | Zindaa.mn
2019 оны 07 сарын 27

Жирийн ажилчин бидний хувьд автобус хөл дүүжлэх унаа болох нь элбэг. Гэвч Монгол Улсад автобусанд зорчих хүндрэлтэй. Орчин болон зорчигч нарийн бүдүүлэг байдлыг та эндээс харж болно. Нэгдүгээрт автобус ариун цэврийн шаардлага хангаж чаддаггүй нь харваас илт. Нүдэнд ил харагдах том хог байхгүй ч тоос шороо ихтэй. Мөн дээрээс нь нэг шугамын автобус дор хаяж хоёр дахин ачааллаа хэтрүүлдэг. Халуунд хайлж урсах шахаж дүүрэн автобусанд чихэн суухаас өөр аргагүй хүмүүс олон бий. Гэртээ харихын тулд эсвэл ажлаа амжуулахын тулд. Магадгүй мөнгөтэй нэг нь такси хөлөглөх эсвэл хувийн унаатай байх л даа. Гэвч автобус олон нийтийн унаа. Тэр олон нийтийн унааг цэвэр цэмцгэр байлгах тал дээр иргэд өөрсдөө анхаарах нь зүйтэй гэж бодном. Бас болоогүй халуун зунаар дүүрэн чихэлдсэн автобусандаа хэрүүл зодоон хийнэ, архи согтууруулах ундаа хэрэглэсэн нь орилж хашхирна. Олон нийтийн унаагаар зорчиж буй иргэн та өөрийн харилцаа хандлага, ахуйн байдлаа цэгнэн хандахад гэмгүй. Таны орж хогоо хаядаг, ааш авираа гаргадаг унаанд чинь олон хүн үйлчлүүлдэг гэдгийг мэдэхэд илүүдэхгүй байх. Та олон нийтийн хоолны газар хогоо хаяж, чанга хашхирч ярьдаггүй л байлгүй. Үүнтэй адил автобус ч гэсэн олон нийтийн үйлчилгээний газар гэдгийг ухаарах хэрэгтэй юм шүү. Үүгээр танд автобус гэж ганц хөлд дүүжлэх унаагаа цэвэр цэмцгэр ашиглаж байцгаая хэмээн уриалах гэсэн юм. Цэвэр, тайван орчинд өглөө ажилдаа ирэх чинь таны тэр өдрийн ажлын эрч хүчийг ч тодорхойлж болох юм шүү.  

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top