Ч.Мөнхзул: “Баянтэс” уурхайг шалгасан ДҮГНЭЛТ ирэх мягмар гарагт гарна

"Тост, Тосон бумба" үндэсний хэлэлцүүлгийн хоёрдугаар хэсэг Төрийн ордонд үргэлжилж байна.

БОАЖЯ-ны Усны нөөцийн хэлтсийн даргын үүргийг түр орлон гүйцэтгэгч Ч.Мөнхзул "Тост, Тосон бумбын нурууны сав газрын усны нөөц, өнөөгийн байдал, уул уурхайн үйлдвэрлэл, үйл ажиллагааны нөлөөл, үр дагавар, ус ашиглалтын хууль тогтоомжийн хэрэгжилт" сэдвээр илтгэл тавилаа. 

Тэрбээр "БОАЖ-ын сайдын тушаалаар байгуулагдсан ажлын хэсэгт орж ажиллан, наймдугаар сарын 4-нд уурхайн нөхцөл байдалтай танилцсан. Устай холбоотой хяналт шалгалтыг хийсэн. Багийн гишүүн, доктор н.Жавзан Шинжлэх ухааны хүрээлэнгийн усны нөөц, ус ашиглалтын салбарын төлөөлөл болж мөн явсан. Ажлын хэсэгт томилогдсон н.Чинзориг Хээрийн ажлын судалгааны төлөвлөгөөний дагуу Сэлэнгэ аймагт томилолттой байсан учир явж чадаагүй гэдгийг албан ёсоор мэдэгдэх нь зүйтэй байх.

Ажлын хэсэг хээрийн судалгааны арга зүй, хэмжилт судалгаа, орчны бичлэг хийж, фото зураг авч ажилласан. Баянтэсийн нүүрсний уурхайн ойр байх шүүрлийн усны дөрвөн цэг, гурван булаг, хоёр худаг, нийт есөн газраас дээж авсан. Есөн дээжийг нийт 54 үзүүлэлтээр олон улсын итгэмжлэгдсэн хөндлөнгийн лабараторид шинжлүүлэхээр өгсөн байгаа. Хамгийн хурдандаа ирэх мягмар гарагт (2019.08.13) хариу гарна. 

Том сайрын аман дээр байгаа Баянтэсийн нүүрсний уурхайн дөрвөн хэсэгт хэмжилт хийж, усны сорьц авсан. Ажлын хэсгийн гишүүн Х.Мандахбаяр ширгэсэн булаг дээр очиж, дээж авах хүсэлт гаргасны дагуу тухайн газар очиход устсан, чийгтэй шороотой хэсэг газар байсан. Усгүй учир сорьц авах боломжгүй байсан. Байгалийн тогтоцоор булаг биш гэдэг нь батлагдсан. 2010, 2015, 2017 оны мэдээллээр тухайн газар нутагт булаг байсан гэсэн тооллого бүртгэгдээгүй. Уурхайн ажилчдын гаргасан ундны усны худгаас дээж авсан. Бохироо саванд хадгалаад, орон нутгийн гэрээгээр зөөвөрлөдөг юм билээ. Шинжилгээний хариу гарсны дараа дүгнэлтээ танилцуулах болно" гэв.