НОМЫН ХУРИМ: Их найрагч бидний дэргэд үгүй ч...

"Миний ээж бөртийгөөд үлдсээн. Миний сэтгэлийн тал үлдсэн. Аавыгаа алдахад надад сэтгэлийнхээ талыг гээсэнтэй адилхан байсан. Энэ бол гаргүй, хөлгүй байснаас ч долоон дор мэдрэмж л дээ. Сэтгэлийн их орон зайгаа алдана гэдэг... Сэтгэлийг минь дүүргэж байсан хүнээ энэ ертөнцөд алдана гэдэг л хамгийн аймшигтай..." хэмээн их найрагчийн хүү Л.Хасар ярьж байсан нь толгойд эргэлдсээр хүн зон олон цугласан Интерном номын их дэлгүүрийн хоёрдугаар давхарт гарч очлоо. 

Энэ өдөр (2019.09.03) Монгол Улсын Хөдөлмөрийн баатар, Төрийн шагналт, Соёлын гавьяат зүтгэлтэн, Ардын уран зохиолч, яруу найрагч Бавуугийн Лхагвасүрэн агсны “Морин зэрэглээ” номын нээлт болсон билээ. Энэ өдөр гэдэг нь өнгөрсөн лхагва гараг л даа. Их найрагч Б.Лхагвасүрэн Монголын уран зохиолоос гадна их театрын урлагт хүчин зүтгэж явсныг гэрчлэх мэт урлагаар холбогдсон сэтгэлийн олон нөхөд нь цугласан байв. 

Монгол "Эдип хаан" гэгддэг "Тамгагүй төр" жүжгийг нь театрын урлагтай нэр холбогдсон хэн бүхэн бараг л шүтлэгээ болгосон, түүнээс өөр хэн унасан газраа "Боржигоны бор тал шиг" бичиж чадсан бол гэдэг сонин. Сүү шиг олон, олон шүлгийг нь цээжилж өссөн учраас бид магагдгүй хүн чанар, сэтгэлээ гээгээгүй яваа ч юм бил үү... "Морин зэрэглээ" номын нээлтийн үеэр бодлууд ар араасаа хөвөрсөөр л байсан. Номын садангууд шинэ номоо өлгийдлөө, номын хурим боллоо гэж бэлгэдэн ярьдаг. Их найрагч буй биеэрээ бидний дэргэд үгүй ч, оюун бодол, зүрх сэтгэл, сэрэл мэдрэмж бүрээсээ төрүүлсэн "шүлэг" хэмээх хүүхдүүд нь номын хуримаа хийлээ.

"Л.Хасар: Би эцгийн хайрыг ойлгоогүй явсан" ярилцлагыг уншихыг хүсвэл ЭНД дарна уу. 

"#BOOKTELLER: “МОРИН ЗЭРЭГЛЭЭ”-н дундаас уургалсан ТАВАН ШҮЛЭГ" уншихыг хүсвэл ЭНД дарна уу.