Хэрэг нь шүүхийн шатанд яваа НЭР ДЭВШИГЧИД

Сонгуулийн ерөнхий хорооноос албан ёсоор УИХ-ын 2020 оны ээлжит сонгуульд өрсөлдөх эрхээ өвөртөлсөн нам, эвслүүд өнгөрсөн бямба /2020.05.16/ гарагт нэр дэвшигчдээ тодруулж дууссан билээ. 

Тэгвэл намаасаа нэр дэвших эрхээ авсан гурван нэр дэвшигчид холбогдох хэрэг шүүхийн шатанд явна.

Өөрөөр хэлбэл, Хотын дарга асан Э.Бат-Үүл болон Сангийн сайд асан С.Баярцогт, "Иргэдийн шударга шүүх" төрийн бус байгууллагын тэргүүн Х.Бат-Ялалт нарт холбогдох хэргийг шүүх хянаж эцэслээгүй байна. Хэрэв Сонгуулийн ерөнхий хорооноос С.Баярцогт, Э.Бат-Үүл, Х.Бат-Ялалт гурвын нэр дэвшихийг зөвшөөрөх аваас УИХ-ын 2020 оны ээлжит сонгууль дуустал шүүх хуралдааныг хойшлуулах юм. Харин тэд тойрогтоо ялалт байгуулж УИХ-ын гишүүнээр сонгогдсон тохиолдолд дөрвөн жил хуулийн хамгаалалтад орно. Эсрэгээрээ ялалт байгуулж, сонгогдож чадаагүй тохиолдолд шүүх хурлыг товлож, хэргийг нь эцэслэх билээ.  

С.БАЯРЦОГТ СЭЛЭНГЭ АЙМАГТ НЭР ДЭВШИНЭ

УИХ-ын 2020 оны ээлжит сонгуульд Сангийн сайд асан С.Баярцогт АН-аас Сэлэнгэ аймагт нэр дэвших эрхээ авсан билээ. Гэвч түүнд холбогдох хэрэг шүүхийн шатанд яваа бөгөөд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд энэ сарын 25-ны өдрийн 09:00 цагт болно. Түүнийг Ерөнхий сайд асан С.Баяр нартай нийлж, Оюутолгойн гэрээг үзэглэхдээ эрх мэдэл, албан тушаалын байдлаа ашиглаж бусдад давуу эрх олгосон байж болзошгүй гэх үндэслэлээр яллагдагчаар татан шалгаж байгаа билээ. 

Э.БАТ-ҮҮЛ ХЭНТИЙ АЙМАГТ НЭР ДЭВШИНЭ

Хотын дарга асан Э.Бат-Үүл найм дахь удаагийн парламентын сонгуульд Хэнтий аймагт АН-аас нэр дэвших эрхээ авсан. Гэвч түүнд болон түүний хүү Б.Чулуудай нарын 10 хүнд холбогдох хэрэг шүүхийн шатанд яваа юм. Өөрөөр хэлбэл, яллагдагч Э.Бат-Үүл нарыг эрх мэдэл, албан тушаалын байдлаа ашиглаж улсад их хэмжээний хохирол учруулсан гэх үндэслэлээр яллагдагчаар татсан байдаг. Тэдэнд холбогдох хэргийг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд дэнсэлж байна. Гэвч өнгөрсөн лхагва /2020.05.13/ гарагт болсон шүүх хурлыг ирэх зургаадугаар сарын 08-ны өдрийн 10:00 цаг хүртэл хойшлуулаад байгаа билээ. 

Х.БАТ-ЯЛАЛТ СОНГИНОХАЙРХАН ДҮҮРЭГТ НЭР ДЭВШИНЭ 

"Иргэдийн шударга шүүх" төрийн бус байгууллагын тэргүүн Х.Бат-Ялалт УИХ-ын 2020 оны ээлжит сонгуульд "Сахигтун, Үндсэн хуулийн 19 эвсэл"-ээс нэр дэвших эрхээ авсан билээ. Тэрбээр Сонгинохайрхан дүүрэгт нэр дэвшиж байгаа юм. Тэгвэл Х.Бат-Ялалтад холбогдох хэргийн шүүх хурал энэ сарын 08-ны өдөр болсон ч өмгөөлөгч нарынх нь шүүх хурал давхцсан гэх шалтгаанаар шүүх хурлыг ирэх баасан /2020.05.22/ гарагийн 10:00 цаг хүртэл хойшлуулаад байна. Түүнийг УИХ-ын 2016 оны ээлжит сонгуулийн өмнө УИХ-ын гишүүнээр ажиллаж байсан Л.Эрдэнэчимэгийг дарамталж, 50 сая төгрөг авсан хэрэгт яллагдагчаар татан шалгаж байна.