БАЯНХОНГОР: 2021 онд хэрэгжүүлэх томоохон төслүүдээ танилцуулав

УИХ-ын дарга Г.Занданшатарыг Баянхонгор аймагт ажиллах үед нь аймгийн ЗДТГ-ын Хөрөнгө оруулалт хөгжлийн бодлогын хэлтэс, аймгийн удирдлагууд, уг төслүүдийг хэрэгжүүлэх ажлын хэсгийн зүгээс 2021 онд орон нутагт хэрэгжүүлэхээр төлөвлөж байгаа томоохон төслүүдийн танилцуулгыг хийсэн юм.

• Шаргалжуутын рашаанаа хамгаалж, дотооддоо ашиг олох,
• Ингэний сүүгээр биологийн ашиг шимт бүтээгдэхүүн үйлдвэрлэж, брэнд бүтээгдэхүүнтэй болж гадны зах зээлд гаргаж өндөр ашиг олох боломж байгааг төслийг танилцуулсан Д.Хишигбаяр тодосгож байв.
• Мөн шинэ суурьшлын бүсэд 1700 айлын орон сууцны жишиг хороолол байгуулах, тэнд дэд бүтэцүүд, хаус хороолол зэрэг томоохон бүтээн байгуулалтыг өрнүүлэх,
• Сайжруулсан түлш үйлдвэрлэж аймгийн төвийн утааг бууруулах төсөл,

Ногоон тэжээл тариалах, Баян-Овоо сумын Шар бүрдний хөндийд малын тэжээлийн үйлдвэр байгуулах төсөл, Оготонтой булаг түйн гол орчмыг үлгэр жишээ тохижуулан амралт зугаалагын орчин болгох зэрэг томоохон төслүүдийг бэлтгэснээ ажлын хэсэг тус бүрээрээ дэлгэрэнгүйгээр УИХ-ын дарга Г.Занданшатарт танилцуулж, санал зөвлөгөөг нь сонслоо.

УИХ-ын дарга Энэхүү төслүүдийг ажил болгон амжилттай хэрэгжүүлэх нь чухал. Маш сайн төслүүд болсон байна.Төслийг боловсруулсан залуучууддаа талархал дэвшүүлж, амжилт хүсье.

Төслүүдийн танилцуулгаас харж байхад Хонгор нутгийн хөгжил маш хурдтайгаар урагшлах боломж харагдаж байгаа нь сайшаалтай байна. Зарим төслүүд тухайлбал шинэ суурьшилын бүсийн төлөвлөлтүүдийг эргэн сайн нягталж сайжруулах хэрэгтэйг анхааруулаад төслүүдийг яг ажил болгож хэрэгжүүлэх явцад нь бүхий л талаар дэмжиж ажиллана гэлээ.Тэрээр аливаа төсөл хөтөлбөрийг хэрэгжүүлэхэд сайн төлөвлөлт, эдийн засгийн нарийн тооцоо чухлыг дахин дахин анхааруулсан юм.

Уг төслүүдийг амжилттай хэрэгжүүлэхийн төлөө бид бүхий л боломж бололцоо хүн хүчээ, хөрөнгө санхүүгийн, эдийн засгийн ямар л боломж байна шавхан дайчлан ажиллах болно гэдгээ аймгийн удирдлагууд энэ үеэр хэлж, Орон сууцны ипотекийн зээлд дэмжлэг үзүүлж ажиллахыг хүссэн юм.