Т.Хүрэлбат: Т.Чимгээгийн охины ослыг тагнуулынхан зохион байгуулсан гэж харддаг

С.Зоригийн амь насыг бүрэлгэсэн хэргээр ял эдэлж байгаа Т.Чимгээгийн төрсөн ах Т.Хүрэлбаттай ярилцлаа. 

-Ерөнхий сайд саяхан Т.Чимгээтэй очиж уулзсан. Үүнээс хойш түүнийг суллах байх гэсэн бодол хүмүүст төрөөд байна?

-Эрүүдэн шүүсэн баримтыг гурван сая монголчууд бүгдээрээ үзсэн. Хэнд ч ойлгомжтой ийм баримт байхад үүнийг шүүж чадахгүй хоёр жил болж байна. Тийм учраас шүүхээс нааштай хариу гарна гэдэгт итгэхээ байсан. Эрүүдэн шүүсэн хүмүүсээ батлан даалтад гаргачихсан хэрнээ нөгөө хүмүүсээ одоо болтол шоронд байлгасаар л байгаа.

-Та бүхний дараагийн авах арга хэмжээ юу байх вэ?

-Ер нь бол эд нарт итгэх итгэл үлдсэнгүй. Тиймээс болохгүй бол өлсгөлөн зарлана. Мөрөөрөө явж байсан хүнийг хүн алсан гээд ял өгчихлөө. Нотлох баримт байхгүй юм шүү дээ, уг нь бол.

ВИДЕО ХЭЛБЭРЭЭР ҮЗЭХ
 

-Т.Чимгээгийн нэг хүүхэд нь зуурдаар нас барчихсан. Ар гэр нь өнөөдөр ямар байдалтай байгаа вэ?

-Манай Т.Чимгээ гурван хүүхэдтэй байсан. Нэг хүүхэд нь зуурдаар нас барсан. Би бол энэ осолд тагнуулынхныг харддаг. Яагаад гэхээр “Энэ хэргээ хүлээчихсэн бол ийм юм болохгүй байсан шүү” гэж хэлсэн байдаг.

-Охиноо нас барсныг сүүлд нь мэдсэн үү?

-Бид нар бол өөрт нь хэлэлгүй нууцалж байсан. Гэвч тагнуулынхан өөрсдөө Т.Чимгээд энэ тухай хэлсэн юм билээ. Сэтгэлзүйгээр нь дарамтлахын тулд үүнийг хэлсэн гэж боддог. Бид нар чинь эхээс есүүлээ. Тэд нараас маань сүүлдээ хууль бусаар ч хамаагүй тэмцье гэдэг яриа хүртэл гарч байна.

-Т.Чимгээ нөхөртөө хэлэхдээ “Нэг юм өөрт нь уулгасан. Удалгүй ухаан алдсан” гэсэн байдаг. Энэ талаар таны мэдэх юм байна уу?

-Т.Чимгээг барьсны дараа нөхрийг нь бас 14 хоног хорьсон. Тэгэхдээ ухаангүй болгочихсон байгаа бичлэгээ нөхөрт нь үзүүлсэн юм билээ. Б.Содномдаржаа ч гэсэн хэлсэн байдаг шүү дээ, өөрт нь юм тарьсан, өөрийн мэдэлгүй яриад байдаг гэж ярьсан. Тэгэхээр энэ бол магадгүй зүйл.

Эх сурвалж: ӨГЛӨӨНИЙ СОНИН