Х.Нямбаатар: Монголын шүүх Б.Хурц нарын хүмүүст дийлдэж, яргын хэргийг шийдэлгүй өнөөдрийг хүрч байна

Засгийн газрын өчигдрийн хуралдаанаар төр, нийгмийн нэрт зүтгэлтэн С.Зориг агсны амь насыг хөнөөсөн хэрэгт Т.Чимгээ, Б.Содномдаржаа нарыг яллахдаа мөрдөх ажиллагаандаа эрүүдэн шүүсэн асуудлыг хэлэлцсэн байна. Ингээд Т.Чимгээг мансууруулж, нүцгэн зургийг нь авч, бичлэг хийж хурууны хээ зэргийг нь авсан нотлох баримтыг нууцаас гаргажээ.

Энэ талаар Хууль зүй, дотоод хэргийн сайд Х.Нямбаатар өчигдөр (2021.03.10) мэдээлэл хийсэн юм.

Тэрбээр “Т.Чимгээ, Б.Содномдаржаа нарыг эрүүдэн шүүсэн асуудлаар АТГ, ШШГЕГ, ТЕГ, прокурорын холбогдох хүмүүст хэрэг үүсээд шүүхийн шатанд явж байна. Зургаан удаа шүүх хурал болж Дээд шүүхээс удаа дараа буцсан. Хоёр жилийн хугацаанд шийдэгдээгүй явж байна. Монголын шүүх Б.Хурц нарын хүмүүст дийлдэж, энэ эрүүдэн шүүсэн буюу яргын хэрэг шийдэгдэхгүй өнөөдрийг хүрч байна гэсэн үг. Засгийн газар гэмт хэрэгтэй тэмцэх үүрэгтэй. Нэгэнт ард түмэн харсан хэргийг шийдэх ёстой гэдэг үндсэн дээр эмэгтэйчүүдийн эрхийг хамгаалах өдөр Ерөнхий сайд хорих ангид очиж Т.Чимгээтэй уулзсан. Эрүүгийн хэрэг хянан шийдвэрлэх тухай хуулийн 41-ийн нэгд шүүгч, прокурор мөрдөгч илтэд хууль зөрчсөн нь шүүхээр тогтоогдвол шийдвэр хүчингүй болно гэсэн байдаг. Хууль зөрчсөн нь илт байсан. Одоо энэ бичлэг дээр Т.Чимгээг тун бага согтууруулах ундаа хэрэглэсэн үедээ мансуурч ухаангүй болоход нүцгэлж бичлэг хийж хурууны хээ зэргийг нь авсан байгаа. Энэ бол Эрүүгийн хэрэг хянан шийдвэрлэх тухай хуулийг ноцтой зөрчсөн үйлдэл юм. Цаашид Монгол Улсад эрүүдэн шүүх үйл явдал гаргахгүй байхыг бид хуульчилж, ял шийтгэлийг нь чангалах хэрэгтэй гэж үзэж байгаа.

Зарим хэвлэлд Ерөнхий сайд, биднийг Т.Чимгээ, Б.Содномдаржаатай холбоотой хэргээр шоудаж байна гэж шүүмжилж байгаа. 2017 онд Т.Аюурсайхан, Л.Болд, Ж.Батзандан, Л.Оюун-Эрдэнэ бид яг үүнийг л ярьж байсан. Хууль хүчний байгууллагыг цэвэр ажиллуулах ёстой гэдэг асуудлыг тавьсан. Үүний дараа Үндсэн хуульд өөрчлөлт оруулсан. Шүүхийн хуулиудыг өөрчилсөн. Сая нэгдүгээр сард янз бүрийн саад тотгорыг туулж байж батлагдлаа. Гэтэл энэ хуулийг шүүх байгууллага биелүүлэхгүй байна. Зарим хүн Т.Чимгээ, Б.Содномдаржаа хоёрыг суллаач гэж байна. Бид Үндсэн хуульт байгуулалтай улс. Гагцхүү хуульд захирагдах ёстой. Шүүхэд Засгийн газар нөлөөлөх, шүүхийн гаргасан шийдвэрийг Засгийн газар хүчингүй болгох ямар ч эрх байхгүй. Харин бид үүргээ биелүүлэхийн тулд олон нийтийн анхаарлын төвд шилжүүлж байгаа юм” гэв.

Мөн асуултад хариулах үедээ тэрбээр “2019 оны гуравдугаар сарын 16-нд гарсан Засгийн газрын тогтоолоор Төв аймгийн урьдчилан хорих төвд Б.Содномдаржаа, Т.Чимгээ нарыг эрүүдсэн бичлэгийг ил болгосон. Та бүхэн тухайн бичлэгийг үзэж байсан байх. Өнөөдөр (өчигдөр) Т.Чимгээгээс миний нэр дээр өргөдөл ирсэн. Хоёр утгатай зүйл ирж байгаа юм. Нэгдүгээрт, “Тэрэлж” гэх зочид буудалд миний эрхэнд бүдүүлгээр халдсан бичлэгийг хэсэгчилж, нүүрийг маань бүдэгрүүлж гаргаж өгнө үү, хоёрдугаарт намайг хоригдож байхад миний охин амиа алдсан хэргийг шалгаж өгнө үү гэсэн. Үүнийг ТЕГ-т тавьж ТЕГ-аас ил болгоё гэж Засгийн газрын хуралд оруулж ирсэн юм. Нууцад хамаарах ямар мэдээллийг ил болгохыг Засгийн газарт Тагнуулын ерөнхий газар оруулна гэсэн хуультай байгаа” гэлээ.
 

Эх сурвалж: ӨГЛӨӨНИЙ СОНИН