Л.Бямбасүрэнг ЧӨЛӨӨЛЖ ЧАДАХГҮЙ БОЛ сайдад нь хариуцлага тооц

Өнгөрсөн долоо хоногийн даваа (2021.04.02) гарагт Монгол Улсын Ерөнхий сайд Л.Оюун-Эрдэнэ нийтийн тээврийн үйл ажиллагаатай танилцах үеэрээ Л.Халтар сайдад үүрэг, даалгавар өгсөн. Өөрөөр хэлбэл, Зам тээврийн хөгжлийн сайд Л.Халтарыг төрийн шийдвэрийг огоордог, том толгойтой дарга нарыг шаардлагатай бол ажлаас нь чөлөөлөхийг даалгасан билээ.

Ингэхдээ ИНЕГ-ын дарга Л.Бямбасүрэнгийн нэрийг цохож, шаардлагатай гэж үзвэл үүрэгт ажлаас нь чөлөөл гэдгийг хэлсэн байдаг.  

Ерөнхий сайд Л.Оюун-Эрдэнэ "Засгийн газрын шийдвэрийг эсэргүүцдэг төрийн албан хаагч гэж байж болохгүй. Тэр ИНЕГ-ын дарга Л.Бямбасүрэнд анхааруул. Том толгойлсон нөхдөд хариуцлага тооцох хэрэгтэй. Л.Халтар сайд шаардлагатай бол ажлаас нь чөлөөлөөд яв. Ер нь, их олон юм сонсогдоод байгаа шүү" хэмээн хэлж, сануулсан байдаг. 

Тэгвэл Зам тээврийн хөгжлийн сайд Л.Халтар та том толгойлж төрийн шийдвэрийг үл тоодог дарга нартаа хариуцлага тооцож эхэлсэн үү. Ялангуяа Ерөнхий сайдын тодотгосон ИНЕГ-ын дарга Л.Бямбасүрэнг үүрэгт ажлаас нь чөлөөлсөн үү. Үгүй бол хэзээ Засгийн газрын тэргүүнийхээ үүрэг, даалгаврыг биелүүлэх гэж байна. Л.Халтар сайд та ч бас төрийн шийдвэрийг тоодоггүй, том толгойтой хурган дарга нарынхаа адил Ерөнхий сайдынхаа үүрэг, даалгаврыг умартаж, огоорч суугаа юм биш биз дээ. Хэрэв тийм бол доод албан тушаалтан нь болох ИНЕГ-ын дарга Л.Бямбасүрэнг чөлөөлж чадахгүй суугаа Зам тээврийн хөгжлийн сайд Л.Халтарт өөрт нь хариуцлага тооц, Ерөнхий сайд аа. 

-ИНЕГ-ЫН ДАРГА Л.БЯМБАСҮРЭНГИЙН ХУУЛЬ БУС ҮЙЛДЭЛТЭЙ ХОЛБООТОЙ ДАРААХ МЭДЭЭЛЛҮҮД ХЭВЛЭЛЭЭР ГАРЧ БАЙЛАА- 
 

• Л.Бямбасүрэнгийн таван ах, дүүс “Трасткапитал” банк бус санхүүгийн байгууллагаараа мөнгө хүүлдэг.

• ИНЕГ нь гурван өрөө байрны мөнгө буюу 143 сая төгрөгөөр 00 цаас, салфетканы тендер зарлаж “Грандмакс” гэх компанийг компанийг шалгаруулж гэрээ байгуулахдаа хуулийн дагуу бичиг баримтыг үйлдээгүй.

• ИНЕГ-аас 6.6 тэрбум төгрөгийн төсөвт өртөгтэй “Зөөврийн зориулалт бүхий шалгалтын нислэгийн цогц төхөөрөмж” худалдан авах тендер зарлан, “Ач холдинг”, “Ач сервис” ХХК-ийн хамтарсан нэгдлийг шалгаруулж, ИНЕГ-т 750 сая гаруй төгрөгийн хохирол учруулсан. Уг тендер шалгаруулалтыг ИНЕГ-ын дарга Л.Бямбасүрэн баталсан.

• ИНЕГ-ын дэд дарга Б.Алтанцом, НБУГ-ын дарга Д.Эрдэнэбаатар нар Хөшигийн хөндийн нисэх онгоцны буудалд галын командлагчийн зориулалтаар ашиглах зориулалттай Ланд-200 машиныг хадгалах үүрэгтэй хүлээж авсан ч хувьдаа хэрэглэсэн.

• ИНЕГ-ын дарга Л.Бямбасүрэн найзынхаа “Гүрэн” дээд сургуулийг зөвлөхөөрөө сонгон шалгаруулж 640 сая төгрөгийг бэлэглэсэн.

• Ахынхаа хүүхдийг ИНЕГ-ын төсвөөр Сөүлд суралцуулсан. Улмаар тэтгэлгийг 500 ам.доллар болгон 2.5 дахин нэмэгдүүлсэн.

• Улсын болон Иргэний нисэхийн нислэгийн хөдөлгөөний мэдээлэл солилцох нэгдсэн сүлжээ байгуулах ажлыг удаашруулсан гэх зэрэг ИНЕГ-ын дарга Л.Бямбасүрэнтэй холбоотой ноцтой мэдээллийг хэвлэлийнхэн нийтэлж, мэдээлж байсан билээ.