Южин “Пентхаус”-д тоглохоос ТАТГАЛЗАХ гэж байжээ

“Пентхаус-2” цувралын гол дүр болох У Юнхигийн дүрийг бүтээсэн S.E.S хамтлагийн дуучин Южин уг дүрээс татгалзах гэж байжээ.

Тэрбээр энэ талаараа “Noblesse Men” сэтгүүлд ярихдаа “Пентхаус цувралын эхний бүлэг миний хувьд бараг таван жилийн дараа жүжигчний хувьд ажилласан анхны ажил байсан. Би дэлгэцэнд амжилттайгаар эргэн ирж чадах болов уу гэж санаа зовж байлаа. Нэг мэдэхнээ л таван жил өнгөрсөн байсан. Жүжигчний хувьд бол таван жил их урт хугацаа. Би шинээр эхэлж чадах болов уу гэж айж байлаа” гэжээ.

Южин “Пентхаус”-ын У Юнхигийн дүрийг бүтээхээс татгалзах гэж байсан гэнэ. Бүсгүй энэ талаараа “У Юнхигийн дүрийг бүтээхээр шийдэхийн тулд надад хугацаа хэрэгтэй байсан. Энэ дүр үргэлж эрсдэлтэй эмоц, шоконд оруулахаар зүйлүүдээр дүүрэн дүр. Гэхдээ эргэн тойрныхон маань намайг энэ дүрд тоглохыг ятгаж байсан. Тэд намайг чадна гэж хэлж, хүч, зориг өгсөн” гэж ярьжээ.

Дуучин бүсгүй дүрийнхээ бараан талуудтай тэмцэж, хамгийн гол нь бүх хүчээрээ У Юнхиг ойлгохыг хичээсэн байна. Үзэгчид түүний дүрийг ойлгохгүй байх вий гэсэн айдас цувралын туршид түүнээс салаагүй гэнэ.

Южин бүх талаараа У Юнхи байж, дүрдээ үнэнч үлдэж, сайхан сэтгэлтэй эмэгтэй гэдэгт нь итгэж тогложээ. Киноны зохиолч Ким Сун Ок ч Южинээс өөр жүжигчинд уг дүрийг өгмөөргүй байгаагаа хэлж, түүнтэй удаан ярилцсан аж.

Дуучин бүсгүй одоо ямар кинонд тоглохыг хүсэж байна вэ гэсэн асуултад “Уран зөгнөлт бүтээлд ер бусын чадвартай хүний дүр бүтээвэл сонирхолтой байх болов уу” гэж хариулжээ.

Южин одоо 40 настай, нөхөр болон хоёр охины хамт амьдардаг. Тэрбээр 2011 онд жүжигчин Ки Та Ёнтой гэрлэж, Ким Рорин, Ким Рохи гэх хоёр охины эцэг, эх болсон билээ.

К-поп хорхойтнуудын хайртай дуучин Южин нь 1997 онд байгуулагдаж, супер амжилтад хүрсэн S.E.S. хамтлагийн гишүүн юм. S.E.S. хамтлаг нь БНСУ-ын цомог нь хамгийн их борлуулалттай охидын хамтлагаар хоёр удаа шалгарсан. Южин 2000 оноос хэд хэдэн драма, цөөн хэдэн кинонд тоглосон билээ.

“Пентхаус” цуврал дэлхий дахиныг байлдан дагуулсаар байгаа юм. Эхний хоёр бүлэг нь маш их амжилт олсны дараа SBS суваг дараагийн бүлгээ хийж эхэлсэн. “Пентхаус 3”-ын зураг авалт өнгөрсөн дөрөвдүгээр сарын 27-нд эхэлсэн бөгөөд ирэх зургаадугаар сарын 4-нд эхний ангиа үзэгчдийн хүртээл болгох аж.