Мах, махан бүтээгдэхүүний үйлдвэрлэл, худалдааны зохицуулалт мөрдөнө

Архангай аймгийн Засаг даргын орлогч В.Мөнхбат өнөөдөр /2022.11.7/ ХХААХҮЯ-ны Төрийн нарийн бичгийн дарга Т.Жамбалцэрэн, аймгийн ХХААГ-ын дарга Д.Гомбодорж нартай “Хүнсний хангамж, аюулгүй байдал” үндэсний хөдөлгөөний хүрээнд хэрэгжүүлэх арга хэмжээ, зорилт, хүлээгдэж байгаа үр дүнгийн талаар санал солилцлоо.

Уулзалтын үеэр мах, махан бүтээгдэхүүний үйлдвэрлэл, худалдааны техникийн зохицуулалтын тухай сэдэв хөндөгдлөө. 2023 оны нэгдүгээр сараас улс орон даяар нийтийн хэрэгцээнд гаргах махыг заавал үйлдвэрийн аргаар боловсруулах шийдвэр гарчээ.

Тодруулбал иргэдийн гар дээрээс мал, махыг шууд худалдаалагддаг байдлыг зогсоож, зах худалдааны төвүүдээр борлуулагдах махыг уламжлалт аргаар бус үйлдвэрийн аргаар боловсруулж худалдаалдаг зохицуулалт хийгдэх аж.

Шийдвэрийг орон нутагтаа хэрэгжүүлэх ажлыг эртнээс зохион байгуулж, бэлтгэл хангаж ажиллахыг ХХААХҮЯ-ны Төрийн нарийн бичгийн дарга Т.Жамбалцэрэн аймгийн Засаг даргын орлогч В.Мөнхбат, ХХААГ-ын дарга Д.Гомбодорж нарт зөвлөж байлаа.