Барилгын орчны аюулгүй байдал, стандартын талаар зөвлөлдлөө
Монгол Улсын нийслэл Улаанбаатар хотын эрх зүйн байдлын тухай хуулийг 27 жилийн дараа шинэчлэн баталсан нь хот стандарттай болох суурь нөхцөлийг бүрдүүлсэн юм. Улмаар эхний ээлжийн есөн бүлгийн 38 стандартыг хэлэлцэн баталж, өнгөрсөн аравдугаар сарын 1-нээс мөрдөж эхэлсэн билээ. Энэхүү хэм хэмжээ, стандартыг олон нийтэд таниулах, мэдээлэл өгөх зорилгоор холбогдох төрийн болон төрийн бус байгууллага, иргэдийн дунд Хотын стандартын нэгдсэн зөвлөгөөн болон дөрвөн удаагийн салбар зөвлөгөөнийг зохион байгуулж буй. Энэ хүрээнд өнөөдөр “Хотын стандарт, барилгын аюулгүй орчин” салбар зөвлөгөөн боллоо.
Зөвлөгөөний үеэр Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн хотын стандартын тогтолцооны талаар илтгэл тавьж, барилгын салбарын төлөөлөлд мэдээлэл өгсөн юм. Тэрбээр “Хотод амьдарч буй иргэдэд эрүүл, аюулгүй орчин бүрдүүлэх, энэ хүрээнд барилгын салбарт мөрдөж байгаа стандартын талаар мэдээлэл өгч байна. Стандартыг хэрэгжүүлж буй аж ахуйн нэгж, иргэд энэ талаар мэдээлэлтэй байх нь чухал. Тухайн орчинд амьдарч буй иргэдийн хяналт сайн байх тусам стандарт илүү хүртээмжтэй болно” хэмээлээ.
Зөвлөгөөнд нийслэлийн төр, захиргааны байгууллага, барилга угсралт, зураг төслийн чиглэлээр үйл ажиллагаа явуулдаг аж ахуйн нэгжийн төлөөлөл зэрэг нийт 250 орчим хүн оролцож, санал бодлоо хуваалцав. Түүнчлэн барилга, хот байгуулалтын салбарын тэргүүлэх мэргэжилтнүүд хотын батлагдсан стандартууд, стандартын тогтолцоог хөгжүүлэх төлөвлөгөө, иргэд, олон нийтийн оролцоо, барилгын орчны аюулгүй байдал, стандарт, норм дүрмийн талаар цогц мэдээллийг өгсөн юм.
Холбоотой мэдээ
Сэтгэгдэл ( 1 )
Иргэдэд аюулгүй орчин бүрдүүлэх, барилгын салбарт мөрдөж байгаа стандартын талаар мэдээлэл өгчээ. Тэгвэл ХУД-ийн 20-р хорооны нутаг дэвсгэрт байрлах ТЭЦ-Ш-ын урд байрлах ”Туул гарден” хотхоны оршин суугчид бид станцын нүүрсний нунтаг, мөн хажууд үйл ажиллагаа явуулдаг ТЭДМЕНТ бетон зуурмагийн үйлдвэрийн элс, цементийн тоосонд хэдэн жил амьдарсаны эцэст уушигны өвчлөл зонхилж байгааг анхаарна уу? Мөн дулааны улиралд өдөр шөнөгүй ажиллах бетон зуурмагийн техник, машины дуу чимээ нь бидний эрүүл мэндэд заналхийлж бна. Ядаж цемент бетон зуурмагийн үйлдвэрийг нүүлгэж өгнө үү.