Төрийн албаны зөвлөлийн даргад Су.Батболдыг дэвшүүлэх үү?

Төрийн ордон хавиар шинэ томилгоо, халаа сэлгээний асуудал үргэлжилсээр байна. Баттай эх сурвалжийн мэдээгээр Төрийн албаны зөвлөлийн даргыг ойрын үед шинэчилж магадгүй болжээ. Уг албыг одоо хашиж буй Б.Баатарзоригийг УИХ-ын гишүүн асан Сундуйн Батболдоор солих талаар Төрийн ордонд чих дэлсэж байна.

Өдгөө Төрийн албаны зөвлөлийн даргын албыг хашиж байгаа Б.Баатарзориг нь Шинжлэх ухаан боловсролын яам, Гэгээрлийн яаманд газрын дарга, нийслэлийн Засаг даргын нэгдүгээр орлогч зэрэг алба хааж байгаад 2000-2004 онд УИХ-ын гишүүнээр сонгогдон ажилласан. Төрийн албыг 30 жил хашсаны дараа  Төрийн албаны зөвлөлийн  гишүүнээр гурван жил ажиллаад тус зөвлөлийн даргын үүрэгт ажилд 2019 оны хоёрдугаар сараас томилогдсон юм.

Түүний орыг залгахаар МАН-ын удирдах бүрэлдэхүүний дээд хүрээнд яригдаж буй Сундуйн Батболд нь 2002 онд УИХ-ын гишүүн агсан М.Зэнээгийн орыг залган нөхөн сонгуулиар Төв аймгаас УИХ-ын гишүүнээр сонгогдсоноос хойш дөрвөн удаа парламентын гишүүнээр улиран ажилласан юм. Энэ хугацаанд 2004-2005 онд УИХ-ын Төрийн байгуулалтын байнгын хорооны дарга, 2005-2006 онд Засгийн Газрын гишүүн, Хууль зүй, дотоод хэргийн сайд, 2006-2007 онд Засгийн Газрын гишүүн, Монгол Улсын сайд, Засгийн газрын Хэрэг эрхлэх газрын дарга, 2011-2012 онд, УИХ дахь МАН-ын бүлгийн дэд дарга, 2014-2015 онд УИХ-ын Байгаль орчин, хүнс, хөдөө аж ахуйн байнгын хорооны даргаар тус тус ажиллаж байлаа. Тэрбээр 2016 оноос Нийслэлийн Засаг дарга бөгөөд Улаанбаатар хотын захирагчаар томилогдон ажиллаж байгаад 2018 онд өөрийн хүслээр албан тушаалаасаа чөлөөлөгдөж байв.

Су.Батболд Нийслэлийн Засаг дарга бөгөөд Улаанбаатар хотын захирагч байх хугацаандаа Улаанбаатар хотын толгойн өвчин болсон түгжрэлийг сааруулахаар өнөөдөр үйл ажиллагаа нь жигдэрсэн гүүрэн гарцууд, Яармагийн гүүр, Налайхын зам зэргийн дийлэнх ажлыг гүйцэтгэсэн юм. Мөн Туушин зочид буудлын өмнөх замаас эхлээд авто болон явган зам хаасан объектуудыг буулган зам чөлөөх ажлыг эхлүүлсэн. Томоохон эмнэлгүүдийн газрыг бүрэн бүтэн үлдээн авч яаралтай тусламж үзүүлэхэд зориулсан нисдэг тэрэг буух талбай байгуулсан. Яармагт нийслэлийн нутгийн захиргааны зориулалтын ордонг бариулж, албан хаагчдыг нь орон сууцтай болгосон, “Нэг хот-нэг стандарт”-ыг нэвтрүүлэх эхлэлийг  тавьж, Чингэлтэй дүүргийн долоодугаар хорооны нутаг дэвсгэрийн 14 га газарт “Дэд бүтцийн төв” төслийн эхний загвар төслийг хэрэгжүүлэн айлын өрхүүдийг инженерийн шугам сүлжээнд холбож цөөнгүй айлын  янданг  буулгаж цахилгаан халаалттай болгосон гээд замналаас нь дурдвал туршлагатай улстөрчийн нэг юм. Түүний талаар сайн, муу олон зүйл яригддаг ч туршлагыг нь ашиглах нь зүйтэй хэмээн МАН-ын удирдлага үзэж шинэ албанд томилох талаар ярилцаж буй ажээ.

Д.ОЮУН

Эх сурвалж: Өглөөний сонин