Хүндийг өргөлт I Г.Ануужин ААШТ-ээс АЛТАН медаль хүртлээ

БНСУ-ын Жэнжү хотноо Хүндийг өргөлтийн насанд хүрэгчдийн Азийн аварга шалгаруулах тэмцээн (ААШТ) болж байна. 49 улсын 400 гаруй тамирчин хүч үзэж буй тивийн аваргын төлөөх тулаан тавдугаар сарын 4-14-ний өдрүүдэд үргэлжилнэ.

Манай тамирчдаас өнөөдөр “Аврагч” спорт хорооны тамирчин, ОУХМ Г.Ануужин 64 кг-д өрсөлдөж байна.

Дөнгөж сая манай тамирчин огцом болон түлхэлттэй өргөлтийн төрөлд хоёуланд тэргүүлэн, алтан медаль хүртэж, нийлбэр дүнгээр мөн алт, нийт 3 шар медаль энгэртээ гялалзууллаа.
 

Түүний хувьд 2022 оны ААШТ-ээс огцом өргөлтөөр хүрэл, нийлбэр дүнгээр мөн хүрэл медаль хүртэж байсан билээ. 

Монголын багийн бүрэлдэхүүнд Б.Эрдэнэзул (49 кг), Э.Энхтамир (59 кг), Б.Хонгорзул (59 кг), Г.Ануужин (64 кг), Г.Энэрэл (71 кг), М.Анхцэцэг (81 кг) нарын тамирчид багтаж байна.

Шигшээ багийн дасгалжуулагчаар Гавьяат дасгалжуулагч Ц.Хосбаяр, дасгалжуулагч Б.Дэнсмаа нар ажиллаж байгаа.

Түүнчлэн Багийн ахлагч, Монголын хүндийг өргөлтийн холбооны Ерөнхийлөгч Б.Эрдэнэжаргал, Зүүн Азийн Хүндийг өргөлтийн холбооны Дэд ерөнхийлөгч Ч.Даваадорж, Монголын хүндийг өргөлтийн холбооны Ерөнхий нарийн бичгийн дарга С.Үенбаатар, Тэргүүн дэд ерөнхийлөгч Б.Эрдэнэболд, Б.Золбоо нар шигшээ багийнхны хамт Жэнжү хотод очоод байна.

Монголын хүндийг өргөлтийн холбооны удирдлагууд ААШТ-ий үеэр албаны бусад арга хэмжээнд хамрагдаж, уулзалт, хамтарсан бэлтгэл сургуулилт, техник тоног төхөөрөмжийн шинэчлэлийн талаар туршлага судалж, хамтран ажиллах санал, санаачилгуудыг судалж байна.