Таван жилийн өмнө алга болсон охиныг хүчирхийлж, хөнөөсөн этгээдийг илрүүлжээ

Таван жилийн өмнө Хөвсгөл аймгийн Рэнчинлхүмбэ сумаас алга болсон 13 настай охиныг хүчиндэх хэргээр хоёр удаа ял эдэлж байсан этгээд хөнөөж, цогцсыг нуусан байсныг илрүүлжээ. 

Тодруулбал, 2018 оны наймдугаар сарын 7-ны өдөр цагдаагийн байгууллагад Хөвсгөл аймгийн Рэнчинлхүмбэ сумын Далайн зах 4 дүгээр баг, Товгын ар гэх газраас 13 настай, эмэгтэй М гэгч хонь хариулахаар яваад сураггүй алга болсон мэдээлэл бүртгэгдэн, тус аймгийн цагдаагийн газраас сумын Засаг даргын тамгын газар болон нутгийн иргэд, мэргэжлийн анги, байгууллагуудтай хамтран эрэн хайх ажиллагааг 150 хүний бүрэлдэхүүнтэйгээр зохион байгуулж байжээ. 

Хэргийн мөрдлөг, шалгалт тухайн үедээ үр дүнд хүрээгүй ч хэрэг бүртгэлтийн хэрэг нээн, тус хэргийг шалгах ажлын хэсэг байгуулж, мөрдөн шалгах ажиллагааг тасралгүй зохион байгуулсаар байсан аж. 

Мөрдөн шалгах ажиллагааны явцад хохирогчийн амь насыг өмнө нь хүчиндэх гэмт хэрэгт 2 удаа ял шийтгэгдэж байсан, 38 настай, эрэгтэй Б гэгч хохироосон байж болзошгүй нөхцөл байдал тогтоогдсон бөгөөд сэжигтэй этгээдийг эрэн сурвалжлах ажиллагааг зохион байгуулж, түүнийг Өмнөговь аймгийн Ханбогд сумын Цагаан хад гэх газраас олж тогтоожээ. 

Таван жилийн өмнө хохирогчийн амь насыг хохироон хэргийн газраас 3 километр газарт зөөвөрлөн, модон дунд нуусан байсныг илрүүлэн мөрдөн шалгах ажиллагааг үргэлжлүүлж байна.