Дундговийн Сайхан-Овоо сумын иргэд “Петровис ресурс” ХХК-ийг эсэргүүцэж, мэдээлэл хийлээ

Дундговь аймгийн Сайхан-Овоо сумын иргэд тус суманд үйл ажиллагаа явуулж байгаа “Петровис ресурс” ХХК-ийг эсэргүүцэж өнөөдөр /2023.05.17/ мэдээлэл хийлээ.

Тус компани нь Сайхан-Овоо сумын нутаг Төгрөг хайрхан уулын энгэрт 2022 оны арваннэгдүгээр сараас уул уурхайн хайгуул хийх зөвшөөрөл авсан нэрээр хууль бус үйл ажиллагаа явуулж байгаа гэлээ.

Сумын иргэд холбогдох яамдууд дээрх компанийн үйл ажиллагаатай холбоотой хууль бус дүгнэлт гаргасан гэж үзэж, шүүхэд хандсан байна.

Дундговь аймгийн Сайхан-Овоо сумын Төгрөгийн багийн иргэн н.Олзбат "2021 оны арваннэгдүгээр сарын 15-18-ны хооронд багийн иргэдийн нийтийн хурал болсон. Энэ хурал дээр “Петровис ресурс” ХХК-ийн хоёр залуу очиж, багийн иргэдийн нийтийн хурлын багийн даргыг сонгох сонгуулийн ирц явагдаж, ирцийн бүртгэлийг нарийвчилсан үнэлгээнд хавсаргасан малчдын гарын үсгийг хуурамчаар бичиг баримтдаа хавсаргасан байдаг. Мөн Сайхан-Овоо сумын 23 айлын хороо бууцны зургийг өөрсдийн нарийвчилсан үнэлгээнд хавсаргасан. Үүнийг хууль бус үйлдэл гэж малчид бид үзэж байгаа юм. Үүнийг шалгуулахаар Дундговь аймгийн цагдаагийн газарт хандаж, шалгалт явагдаж байгаа" гэв.

Сайхан-Овоо сумын иргэн: Уул уурхайн хууль бус үйл ажиллагаа явагдаж байгаа тухай, ялангуяа Төгрөг хайрхныг тойрсон Төгрөг багийн малчид болон Сайхан-Овоо сумын малчид усны мэргэжлийн хүний хувьд над руу хандсан. Би мэргэжлийн хүний хувьд ус ашиглах дүгнэлт заавал гардаг. Уул уурхай бол ус заавал хэрэглэдэг. Ялангуяа өрөмдлөг хийхэд технологийн ус ашигладаг. Үүнийг аваад үзэхээр ус ашиглах дүгнэлт, гэрээ хэлцэл нь дандаа хууль бус хийгдсэн. Өөрөөр хэлбэл Монгол Улсын Усны тухай хуулийн 28 дугаар зүйл дээр уул уурхайд ус ашиглах тухай дүгнэлт гаргах тодорхой заалт байгаа. Энэ хуулийг зөрчсөн байгаа юм.

Үүнийг нь би тодорхой зүйл ангиар нь гаргаад ус ашиглах дүгнэлт зөрчилтэй гэдгийг гаргаж өгсөн. Ус ашиглахад Усны тухай хуулийн 28 дугаар зүйлээр бол уурхай нь 10 гаруй зүйлийг бэлдэж өгөх ёстой, гэрээ хэлцэл хийх ёстой.

Уул уурхай ч бай, янз бүрийн үйлдвэрлэл явуулахад ус ашиглах тодорхой заалттай байдаг. Ялангуяа усны эх үүсвэр тодорхой, нөөц, чанар, хоногт ашиглах усны хэмжээ тодорхой байж гэрээнд тусгагддаг. Гэтэл яг энэ хуулийн заалтууд зөрчигдсөн. Хэдийн хэмжээний ус ашиглах нь тодорхойгүй, чанар найрлагыг нь тогтоогоогүй байна.

Иргэдийн ундны усыг энэ уул уурхайн компани өрөмдлөгтөө ашигласан. Өөрөөр хэлбэл өрөмдлөгт хэрэглэж байгаа хольц, технологитоо дүрсэн хоолойгоо ундны усны худар руу хийж, усыг соруулж авсан. Ямар хэмжээтэй ус авч байгаа нь мэдэгдэхгүй. Хуулиар бол хэрэглэгчдийн уснаас авах ёсгүй байдаг." гэв.