Д.Цэвээнжав: ҮХН-ийн хэлэлцүүлэг дэг журмынхаа дагуу явах ёстой

“Төр, нийгмийн ахмад зүтгэлтний зөвлөл”-өөс  УИХ-ын даргад хандсан талаар тус ТББ-ын  тэргүүн Д.Цэвээнжаваас тодрууллаа.

-Төр, нийгмийн ахмад зүтгэлтнүүд Үндсэн хуулийн нэмэлт, өөрчлөлтийн асуудлаар УИХ-ын даргад хандсан гэсэн. ҮХӨ-д ямар байр сууриас хандаж байгаа вэ?

-Монгол Улсын Үндсэн хууль бол бусад хуулиудаас өвөрмөц онцлогтой. Тэр онцлог нь юу вэ гэвэл  Монголын ард түмэн төр,засагтайгаа хийсэн гэрээ юм. Иймд бусад хуулиас өвөрмөц нөхцөлд хэлэлцдэг, баталдаг ийм журамтай. Иймд Үндсэн хуульд нэмэлт, өөрчлөлт оруулах асуудлыг хэлэлцэхдээ энэ хуулийнхаа суурь зарчмыг зөрчиж байна гэж манай ахмад зүтгэлтний зөвлөл үзэж байгаа юм.

-Танай ТББ-ын бүрэлдэхүүнд ямар хүмүүс багтдаг вэ?

-Төр, нийгмийн ахмад зүтгэлтнүүдийн зөвлөл гэдэг бол Монголын төр, засагт алба хашиж байсан үе үеийн төлөөлөл, Үндсэн хууль батлалцсан болон УИХ-ын гишүүн байсан  хүмүүс, хөдөлмөр зүтгэлээрээ Хөдөлмөрийн баатар, гавьяат  болсон ахмадууд багтдаг.

-Үндсэн хууль батлалцсан олон хүн байдаг юм байна гэж ойлголоо?

-АИХ-ын депутат байсан болон Улсын Бага хурал, УИХ-ын гишүүн байсан хүмүүс, Үндсэн хууль тогтоогчдоос энэ ТББ маань бүрддэг.

-Та бүхний дэвшүүлж байгаа гол асуудал юу вэ?

-Манай ТББ-ын гишүүдийн  дэвшүүлж  байгаа асуудал бол  Үндсэн хуульд нэмэлт, өөрчлөлт оруулах үйл явц алдаатай яваад байгаа юм биш үү. Яагаад ард түмэнд үнэн зөв мэдээлэл өгөхгүй байна вэ гэдэгт эмзэглэж байгаа. Ер нь бол Үндсэн хуулийн нэмэлт, өөрчлөлтийн асуудалтай  холбогдуулан төр, нийгмийн ахмад зүтгэлтний зөвлөл цуглаж, хоёр ч удаа санал солилцсоны үндсэнд УИХ-ын даргад хандахаар тогтсон юм. Монголын төр, засгийг удирдаж байгаа хүмүүст, ялангуяа УИХ-ын даргад энэ талаар тодорхой мэдээлэл өгөх нь зүйтэй гэж үзсэн. Тиймээс албан бичгээр хандсан.

-Хариу ирсэн үү?

-Хариу нь хараахан ирээгүй байна. Албан ёсны хариу өгөх байх.

-Та сая тодорхой мэдээлэл өгөх нь зүйтэй гэж үзсэн гэлээ. Ямар мэдээллүүд өгсөн юм бэ?

-Бидний өгч байгаа энэ мэдээлэл бол нэгдүгээрт, төр, нийгмийн ахмад зүтгэлтнүүдийн зүгээс иргэнийхээ үүргийг биелүүлж байгаа хэрэг юм.  Хоёрдугаарт, ахмад хүмүүсийн хувьд залуустаа зөвлөгөө, анхааруулга, сануулга өгч байгаа гэж ойлгож, хүлээж авах нь зүйтэй байх. Гол асуудал бол Үндсэн хуульд өөрчлөлт оруулах үйл явц алдаатай яваад байгаа юм биш үү. Яагаад ард түмэнд үнэн зөв мэдээлэл өгөхгүй байна вэ гэдэгт эмзэглэж байгаа гэдгээ би түрүүнд хэлсэн.

-Үндсэн хуулийг өөрчлөх нь  зөв үү, буруу юу гэдгийг та юу гэж үздэг вэ?

-Үндсэн хуульд өөрчлөлт оруулах асуудал нь зохих ном, журмын дагуу явах юм бол буруу зүйл биш. Үндсэн хуулийн нэмэлт, өөрчлөлтийг хэлэлцэх асуудал дэг журмынхаа дагуу явах ёстой. Үүнийг бид сануулж байгаа юм.

Ч.ЗОТОЛ

Эх сурвалж: ӨГЛӨӨНИЙ СОНИН