Илья Фрейманов: З.Шинэчагтгыг хүнд цохилтоор ялах болно

Энэ сарын 10-нд Бангкок хотод ONE холбооны “ONE Fight Night 11” тэмцээн болно. Тус тэмцээнд аваргын бүсний төлөө хоёр тулаантай бөгөөд тэдний өмнө манай З.Шинэчагтга Оросын тамирчин Илья Фреймановтой гар зөрүүлэх юм. Илья тулааны талаар Оросын сэтгүүлчдийн асуултад хариулжээ.

-Алдарт Мартин Нгуеныг хүнд цохилтоор ялсныхаа дараа та огт тулалдсангүй. Яагаад?

-Холбооноос өрсөлдөгч гаргаж өгөөгүй болохоор тэр. Гаргаж өгсөнүүд нь ямар нэг шалтгаанаар тулалдахаа болиод байлаа. Мартиныг ялсны дараа ONE холбооноос хагас хөнгөн жингийн чансааг тэргүүлдэг Тан Литэй 21 хоногийн дараа тулалдах санал тавьсан. Тэгснээ нэгдүгээр сар болтол хойшлоод эцэст нь Ли толгойдоо гэмтсэн гэдэг шалтгаанаар цуцлагдсан. Дараа нь Киргизийн тамирчинг оноосон ч нөгөөх нь бас алга болчихлоо. Холбооноос надтай тулалдах ямар ч тамирчин алга гэж байснаа гурван сарын дараа Монголын тулаанчийг санал болгосон. Угаасаа З.Шинэчагтга л ганцаараа надтай тулалдахад бэлэн гэж хэлсэн гэсэн. Би эхлээд өөр өрсөлдөгч олж өг гэж шаардсан. Ли толгойны гэмтэл нь эдгэрсэн байх гэж хэлээд бүтээгүй. Монголоос өөр тулаанч байхгүй гээд би зөвшөөрөхөөс өөр аргагүй болсон. Харин одоо монгол өрсөлдөгчөө их “хайрлаж” байгаа. Бусад шигээ битгий алга болчихоосой гэж бодоод л.
 

-Шилдэг тулаанчид танаас айгаад байгаа хэрэг үү?

-Айсан гэж яримааргүй байна. Олон шалтгаан байна. Юуны өмнө БИЗНЕС. Мартин Нгуентай тулалдахад хэн ч над дээр бооцоо тавиагүй. Тиймээс одоо ихэнх тамирчин надтай өрсөлдөхөөс зайлсхийж байгаа. Шилдгүүд яагаад зугтаад байгааг би мэдэхгүй, бас хамаагүй том зүйл яримааргүй байгаа ч Ли гэхэд ямар нэг хариу өгч болно шүү дээ. Тэд надаас эмээж байгаа гэж хэлэхэд болох байх.

-Та одоо хагас хөнгөн жингийн чансааны 3-т эрэмблэгдэж байна. Аваргын бүсний тулаан хэр ойрхон байгаа вэ?

-Холбоо ямар бодолтой байгааг мэдэхгүй ч маш ойрхон байгаа гэж би бодож байна. Нэг, хоёр хурц тулаан хийхэд аварга цолны төлөө тулалдах боломж олгох байх. Харин одоо надад чансааны эхний тавд ордоггүй, монгол өрсөлдөгч оноолоо. Монгол тулаанчийг чансааны хэдэд жагсдагийг би сонирхоогүй. Холбоонд 7 тулалдаж, нэг удаа ялагдсан, нэг удаа улаан картаар торгуулсан гэсэн. Одоо дараалан ялж байгаа юм уу даа. Ер нь би энэ оны сүүлээр аваргын бүсний төлөө тулалдах байхаар тооцоолж байгаа. Гэхдээ одоо хамгийн чухал нь энэ монгол тамирчныг ялах. Хүнд цохилтоор ялж, хоёр дахь шагналаа авахад элдэв яриа багасах болно. Харин одоо энэ монголтой зодолдохоор бэлтгэж байна.

-Таиландад хэр удаж байна? Бэлтгэл ханасан уу?

-Би 2022 оны аравдугаар сард Мартин Нгуентэй тулалдсанаасаа хойш энд байгаа гэхээр хагас жил гаруй болжээ. Энэ бүх хугацаанд шилдэг тулаанчидтай хамтарсан бэлтгэл хийлээ. UFC холбооны шилдгүүдтэй ч бэлтгэл хийсэн. Байнгын бэлэн байдалд өрсөлдөгчтэй болохоо хүлээж байлаа. Өрсөлдөгч тодорлоо, бэлтгэл ч ханалаа, жиндээ ч орлоо. Тулаанд би бэлэн байна.