Дундаж цалин 380.700  төгрөгөөр нэмэгдэж, 1.8 сая болжээ

2023 оны нэгдүгээр улирлын байдлаар аж ахуйн нэгж байгууллагуудын ажиллагчдын сарын медиан цалин 1 сая 352 мянга 900 төгрөг байна гэж Үндэсний статистикийн хорооноос танилцууллаа.

Медиан цалин гэдэг нь ажиллагсдын цалинг өсөх эсвэл буурах эрэмбээр байршуулсан цувааг таллан хувааж байгаа ажилтны цалин юм.

Нийгмийн даатгалын ерөнхий газрын нийгмийн даатгалын шимтгэл төлөлтийн тайланд нэгдүгээр улирлын байдлаар нийт 49.3 мянган аж ахуйн нэгж, байгууллага (ААНБ)-ын 736.8 мянган ажиллагч хамрагдсан байна.

Нийгмийн даатгалын шимтгэл  төлж буй ААНБ-ын тоо өмнөх оны мөн үеэс 2. 4 (5.1%) мянгаар өмнөх улирлаас 307 (0.6%)-оор өссөн бол ажиллагчдын тоо өмнөх оны мөн үеэс 19.1 (2.7%) мянгаар өсөж, харин өмнөх улирлаас 19.2 (2.5%) мянгаар буурчээ. Нийгмийн даатгалын ерөнхий газрын нийгмийн даатгалын шимтгэл төлөлтийн нэгдүгээр улирлын тайланд хамрагдсан 736.8 мянган ажиллагчдын сарын медиан цалин эхэнд дурдсанчлан 1352.9 мянган төгрөг байна. Медиан цалин өмнөх улирлаас 67.6 (5.3%) мянган төгрөгөөр нэмэгджээ.

Нэг ажилтанд ногдох сарын дундаж цалин нэгдүгээр улирлын байдлаар 1.8 сая төгрөг болж, өмнөх оны мөн үеэс 380.7 (26.3%) мянган төгрөгөөр, өмнөх улирлаас 80.6 (4.6%) мянган төгрөгөөр нэмэгджээ.