Ц.Содномдорж: Г.Жамбалдорж оо, миний дүү худал ярьж болохгүй

Ардын хувьсгалын 102 жилийн ойн баяр наадмын үндэсний бөхийн барилдаанд шөвгийн наймд үлдэж, долоогийн даваанд Даян аварга Н.Батсуурьт Хөлийн цэцийн шийдвэрийн дагуу идэвхгүй барилдсан шалтгаанаар тахимаа өгсөн Улсын арслан Ц.Содномдорж өөрийн сошиал хуудсаар тайлбар хийлээ. 

Тэрбээр "Өчигдөр Хүй долоон худаг орж, цол, чимгээ аваад ирсэн. Ядраад эрт унтжээ. Орой сэрээд хэвлэлээр зарим ташаа мэдээлэл явж байгааг харлаа. Би хоёр зүйл дээр тайлбар хэлье гэж бодлоо. 

Нэг нь, дөрвийн давааны оноолт буюу аймгийн арслан Г.Жамбалдоржтой хийсэн барилдаан. Нөгөө нь долоогийн давааны барилдаан. Энэ хоёр барилдаанд юу болсныг үнэн, зөвөөр нь хэлье.

Дөрвийн даваа оноолтоор барилддаг. 2003 оноос ам биш оноолт болгосон. Энэ жил би дөрвийн даваанд Баянхонгор аймгийн харьяат, аймгийн арслан Г.Жамбалдоржтой таарч барилдсан. Г.Жамбалдорж сайхан залуу байна лээ, сайхан цолонд хүрэх байх. Гэхдээ миний дүү хэн нэгэн хүний явуулгаар ч юм уу, худал ярьж болохгүй шүү. Үнэн гэж байдаг юм. Би барилдааныхаа бүх процессыг хэлье. Барилдаанд чи намайг 3-4 удаа сэрвүү барьцнаас түрж гаргасан. Энэ үед надад сануулга өгсөн. Ухарч гараад байна гэж. За гээд хүлээж авсан. Цаг болж, элэг бүс сэнжиг авсан. Энэ барилдаанаас чи намайг мөн хоёр удаа түлхэж гаргасан. Бас л намайг ухарч гарлаа гэж сануулсан. Энэ сануулгыг хэд дэх минутад өгснийг сайн санахгүй байна, хорин хэд дэх минут болов уу. Ингээд золгооны барьцанд хүрсэн. Золгооны барьцанд хүрэхэд анх идэвх авснаар нь Г.Жамбалдоржийн талаар золгоно гэсэн. Г.Жамбалдорж өөрөө баруун золгоё гэсэн. Баруун золгож барилдсан. Барилдаж эхэлснээс хойш баруун золгооны барьц задарсан. Ингэж явсаар миний нэг барьц салаагүй байхад "Ах аа, хоёулаа барьцаа задлах уу" гэсэн. Ээлжилж баруун, зүүн дан золгосон. Улмаар энэ барилдааныг шинэ дүрмийн барьцанд шилжүүлсэн. Энд бас нэлээд удсан. Энэ үед барьц салгая гэж чи юу ч яриагүй, хэлээгүй. Алсын сүвээний барьц аваад өргөхөд чи "Болоогүй байсан ш дээ" гэж орилсон. Давчаад, буцаж ирэхэд "Барьцаа задалсан байсан" гэж хэлсэн. Барьц тавьсан бол чиний буруу. Хоёрт, чи "Барьцаа салгая" гэж хэлсэн бол би салгах байсан. Би чамд нэг ч удаа барьцаа салгая гэж хэлээгүй шүү. Чи өчигдөр ярихдаа, "Ц.Содномдорж арслан намайг барьцаа тавья гэчихээд, дараа нь унагаасан" гэж ярьсан байсан. Г.Жамбалдорж оо, ингэж худлаа ярьж, олон нийтийг талцуулж болохгүй шүү. Бид хоёр харгүй сайхан барилдсан. Миний алдаа бол чамайг "Барьц салъя" гэхэд "За" гээд салж байсан нь байж. Тэр миний буруу болж. Монгол бөхийн торгон ногоон дэвжээ үнэн мөнийг шүүнэ. Ингэж болохгүй, ор үндэсгүй юм ярьж болохгүй. Би өдий хүрэхдээ чамаас тэгж нэг даваа авах дээрээ арай тулаагүй. 
 

Долоогийн даваанд Н.Батсуурь аварга бид хоёр харгүй сайхан барилдсан. Бид хоёр ямар ч тохиолдолд бие биедээ бууж өгөх юм уу, тийм буруу зөрүү зүйл байдаггүй. 

Бөхийн дүрэм шинэчлэгдсэн юм байна лээ. Дүрмийн өөрчлөлтийг би сайн ойлгоогүй байсан. Идэвхээр хасахаас өмнөх барьцтай барилдааны дүрэм өөрчлөгдсөн. Арав хонохгүй хугацаанд бид барьц, барилдааны өөрчлөлтөд дасахгүй байна. Гэлээ гээд энэ барилдаанд Н.Батсуурь аваргын буруу байхгүй. Намайг сая амлалаа гээд уурласан юм байхгүй. Харгүй сайхан барилдсан, дүрмээрээ шийдвэр гарсан. Би "Дахиад 10 минут барилдчихъя" гэхэд аварга “Үгүй, дүрмээ дагана” гэсэн. Гол нь барилдааны дүрмээ цагийг нь тулгаж бөхчүүдэд танилцуулсан учраас бөхчүүд бид шинэ дүрмийн талаар нарийн, тодорхой ойлголтгүй байсан. Арай эртхэн танилцуулсан бол ийм асуудал үүсэхгүй байсан.

Үнэндээ долоогийн даваанд би Н.Батсуурь аваргыг намайг амлана гэж бодоогүй. Бид бие биенийхээрээ орж, гардаг найз нөхдүүд. Сүүлийн жил гаруй хугацаанд харилцаа жаахан хөндийрсөн. 2020 оны наадмын дараа Н.Батсуурь аваргаас сэргээш илэрсэн гэх мэдээлэл явсан. Тухайн үед аваргаас асууж байсан. Аварга ч "Яагаад ийм юм болчив, би допингийн төрлийн юм хэрэглээгүй" гэж ярьж байсан. Дүрмийн дагуу шийтгэл хүлээсэн. Би Н.Батсуурь аваргыг допинг хэрэглэхгүй гэдэгт итгэж байсан. Энэ саналаа МҮБХ-нд ч хэлж байсан. Энэ мэт допингийн асуудлаас болоод бидний дунд жаахан үл ойлголцол гарсан байх. Харилцаа жаахан холдсон. Бие биедээ хатуу, ширүүн үг хэлж байсан ч байх. Наадмын дараа бие биенээсээ уучлал гуйсан, ойлголцсон. 

Миний хувьд Улсын баяр наадамдаа ес дэх жилдээ шөвгөрлөө. Заан болох гэж их зүйл туулж байсан. Дөрөв дэх удаагаа зургаа давж, цааш явж, өнөөдрийн энэ цолонд хүрсэн. Өнөөдрийг хүртэл би огт шантраагүй. Тийм учраас үндэсний бөхийн цолонд зүтгэж байгаа залуустаа битгий яарч, шантраарай гэж захиж, зөвлөмөөр байна" гэлээ.