Ц.Оюунбаатар: Монголын нийгэм сэрж байна

-Бид шударга иргэдээ алдаршуулж, тэднээр бахархах ёстой-

Өмнөговь аймгийн Манлай сумын малчин Х.Цэцэг онц ноцтой гэмт хэрэгтнийг саатуулан баривчилж, цагдаагийн байгууллага мөрдөгчдийн ажилд гүн туслалцаа үзүүлсэн нь олон нийтийн талархалыг хүлээгээд байна. Дорноговь аймгийн Сайншандаас энэ сарын 3-ны өглөө хичээлдээ явахаар гараад сураггүй алга болсон охиныг хулгайлж, улмаар амийг нь хэрцгийгээр хөнөөсөн этгээдийг саатуулан баривчлах ажиллагааг иргэн Х.Цэцэг самбаачлан зохион байгуулж, иргэний үүргээ нэр төртэй биелүүлсэн юм.

Тэгвэл “Хүний эрх, шударга ёс төв” ТББ-аас түүнийг “Шударга журам” медалиар шагнуулахаар тодорхойлсныг хүний эрхийн хуульчид дэмжжээ. Тус төвийн тэргүүн, Монол Улсын гавьяат хуульч Ц.Оюунбаатараас энэ тухай тодрууллаа.

-Хүний эрх, шударга ёс төв малчин Х.Цэцэгийг “Шударга журам” медалиар шагнуулахаар тодорхойлжээ. Энэ үйл явдлыг  танай төв юу гэж дүгнэж байна?

-Юуны өмнө хүүхдийн амь үрэгдсэн ийм онц ноцтой хэрэг гарсанд, хуульч, өмгөөлөгч, энэ чиглэлээр ажилладаг бид сэтгэл маш эмзэглэж, эмгэнэж байна. Хүүхэд хулгайлагдсан даруйд монголчууд бүгд л сэтгэл чилээж, зар түгээж, хайж олоход туслах хөдөлгөөн хүртэл өрнөсөн. Иргэн Х.Цэцэг энэ мэдээллийг хүүхдүүдээсээ аваад замаар зорчиж буй тээврийн хэрэгсэл, автомашиныг ажиглаж  байсан. Улмаар гэмт хэрэгтнийг саатуулж баривчилсан. Иргэд ингэж идэвх зүтгэл гаргаж байна. Энэ бол Монголын нийгэм, иргэд сэрж байгаагийн илрэл юм. Бид шударга ёсыг тогтоож, бэхжүүлэхийн төлөө нийтээрээ тэмцэх ёстой. Иргэний үүргээ биелүүлсэн шударга иргэдээрээ бахархах ёстой. Ийм учраас Өмнөговь аймгийн Манлай сумын малчин Х.Цэцэгийг бид “Шударга журам” медалиар шагнуулахаар тодорхойлсон. Энэ хүн бол  удмын малчин. Аав нь Хүүхэндүү гэж гавьяат нэгдэлчин, тэмээчин хүн. Тэр айлын 11 хүүхдийн нэг. Манлай сумынхаа найман жилийн сургуулийг төгсөөд нутагтаа мал маллаж амьдарч яваа. Одоо бол Манлай сумандаа Өехий багт хоолны газар нээж ажиллуулдаг юм билээ. Анх сэжигтнийг мөн гэдгийг мэдээд, асууж шалгаагаад охин амьд байгаа гэж сонсчихоод  бусад хүмүүс, тэнд байсан жолооч нар тайвшраад гараад явсан. Тэр хооронд нөгөө этгээд хайч аваад  гэдэс рүүгээ хатгаж байгааг хараад “Чи чинь яаж байгаа хүүхэд вэ. юу болж байгаа юм бэ” гэхэд өөдөөс нь “Ална аа” гээд хайчаа дээр барьж далайгаад ухасхийхэд нь Х.Цэцэг хоёр гараараа цээж рүү нь түлхэж унагаад, тэр чимээнээр хүмүүс орж ирж дарж барьсан юм байна лээ. 

-Хэрэв хэрэгтнийг тэгж саатуулж, баривчлаагүй бол юу ч болж мэдэхээр байжээ?

-Х.Цэцэг бол иргэний үүргээ нэр төртэй биелүүлсэн. Эрэлхэг зориг, авхаалж самбаа гаргаж гэмт хэрэгтнийг баривчилсан. Энэ хүн ”ажиллагаа” зохион байгуулж хэрэгтнийг баривчлуулаагүй бол цаашаа яаж ч мэдэхээр байсан юм билээ. Тиймээс шагнаж урамшуулах нь зүйтэй. Бид шударга иргэдээ алдаршуулж байх ёстой. Хойч үеийнхэн тэднээр бахархаж, үлгэр дуурайл авч байх хэрэгтэй. Дахин хэлэхэд, Монголын нийгэм сэрж байна, Х.Цэцэг шиг шударга иргэд олон байгаа гэж итгэж байна.

XX

Ч.ЗОТОЛ