Үе тэнгийнхний гадуурхал ХЭРЭГТЭН болох, АМИА ХОРЛОХОД хүргэдэг

Сургууль, аливаа байгууллага, хамт олны орчинд гадуурхал, дарамтад өртөх нь хүнийг сэтгэлзүйгээр нь асар их хохироож, бие болоод сэтгэлзүйн насан туршийн гэмтэл учруулж байна.

Дарамтанд байгаа хүн өөртөө итгэх итгэлээ алдаж, ганцаардаж, аажмаар сэтгэл гутралд орсоор эцэст нь амиа хорлох, гэмт хэрэгт орооцолдох зэргээр хохирдог.

Монгол Улс амиа хорлолтоор дэлхийд гуравдугаар байрт жагсаж байна. Гадуурхал, дарамтанд өртөж буй хүний зан төлөв өөрчлөгдөж, гутарч, амьдрах хүсэлгүй болж, амиа хорлох тохиолдол бий. Иймээс сургуулийн орчинд ажиллаж байгаа албан хаагчид болон оюутан, сурагчид дээрэлхэлтийг харсан бол заавал мэдээлэх хэрэгтэй байна.

Эцэг, эхчүүд юуг анхаарах вэ?

Хүүхдүүддээ бусдын ялгаатай байдлыг хүлээн зөвшөөрөхийг сургах, ярилцах, хэлж өгөх

Хов зөөж болдоггүй, эрэгтэй хүүхэд тэсвэртэй байх хэрэгтэй, том хүний өөдөөс юм хэлж болохгүй, хариутай бол бариутай зэрэг хандлага нь аливаа хүчирхийлэл нэмэгдэхэд нөлөөлдөг учир хүүхдэдээ ямар нэг дарамтанд өртсөн үедээ хэн нэгэнд хэлэх, холбогдох байгууллагад хандах зэргийг хэлж өгөх

Өөрийн аюулгүй, эрүүл орчинд сурч боловсрох эрхээ хамгаалахыг хүүхдүүддээ хэлж өгөх, сургах

Дээрэлхэлтийн хэлбэрүүд

Үгээр дээрэлхэх, дарамтлах /гадна төрх, хэлсэн зүйлийг нь шоглох, дооглох, хараалын үгээр доромжлох/

Гэмтэл учруулна гэж сүрдүүлэх

Бэлгийн дарамтын шинжтэй үг хэллэг хэлэх

Бие махбодын дээрэлхэлт, цохих, өшиглөх, чимхэх, түлхэх, бүдрүүлж унагаах

Бусдын эд зүйлсийг булааж авах, эвдэх

Бүдүүлэг дохио, зангаа харуулах

Харилцаанд үүсэх дээрэлхэлт, санаатайгаар гадуурхах

Бусад хүүхдэд хэн нэгэнтэй битгий найзлаарай гэж хэлэх, ятгах

Бусдын талаар цуу яриа тараах

Олны өмнө бусдыг ичгэвтэр байдалд оруулах