ПАРИС-2024 | Монгол тамирчдын өнөөдрийн тэмцээний хуваарь

"Парис-2024" олимпын наадам хоёр дахь өдрөө үргэлжилж байна. Өнөөдөр спортын 4 төрөлд Монгол Улсын 7 тамирчин хурд хүч, цэц мэргэнээ сорих юм. 
 

ЖҮДО 66 кг: 

Эрэгтэйчүүдийн 66 кг-ын жинд Дэлхийн аваргын хошой хүрэл медальт, Үндэсний шигшээ багийн тамирчин Ё.Басхүү 16:00 цагаас өрсөлдөнө. Түүний жинд 27 бөх өрсөлдөх бөгөөд манай тамирчин эхний тойрогт хийлж, удаах барилдаанд Киргиз, Украйны ялсантай шөвгийн 8-д үлдэхийн төлөө хүч сорих юм.

ЖҮДО 52 кг: 

Эмэгтэйчүүдийн 52 кг-д Залуучуудын дэлхийн аварга, Залуучуудын олимпын наадмын мөнгөн медальт, ОУХМ Л.Сосорбарам 16:00 цагаас өрсөлдөнө. Түүний жинд 25 бөх байна. Манай тамирчин эхлээд Испанитай. Ялвал шөвгийн 8-д үлдэхийн төлөө Унгарын бөхтэй барилдана.

УСАНД СЭЛЭЛТ 200м: 

Эмэгтэйчүүдийн 200 метрийн чөлөөт сэлэлтэд “Токио-2020” олимпын наадамд оролцогч, “Ханжоу 2022” Азийн наадмын VIII байрын шагналт, ОУХМ Б.Энххүслэн Улаанбаатарын цагаар 18:00 цагт уралдана.

БУУДЛАГА 10 метр хийн урт буу: 

Буудлага спортын эмэгтэйчүүдийн 10 метрийн хийн урт бууны төрөлд Ази тивийн аваргын хувийн мөнгө, багийн  мөнгө, Азийн наадмын хүрэл  медальт, ОУХМ О.Есүгэн Улаанбаатарын цагаар 15:15 минутад цэц сорино.

БУУДЛАГА 10 метр хийн гар буу:

Эрэгтэйчүүдийн 10 метрийн хийн гар бууны финалын шатанд Дэлхийн аваргын мөнгө, Ази тивийн 1 мөнгө, 2 хүрэл, "Дэлхийн цом"-ын хүрэл, "Универсиад" наадмын алт, мөнгө,хүрэл медальт, ОУХМ Э.Даваахүү Улаанбаатарын цагаар 15:30 минутад өрсөлдөнө. 

БУУДЛАГА 10 метр хийн урт буу:

Эрэгтэйчүүдийн 10 метрийн хийн урт бууны төрөлд оролцож буй ОУХМ Н.Баяраагийн тэмцээн Улаанбаатарын цагаар 17:15 минутад эхэлнэ.

БОКС 50кг: 

Эмэгтэйчүүдийн 50 кг-ын жинд “Ханжоу-2022” Азийн наадмын хүрэл, Ази тивийн хүрэл медальт, ОУХМ О.Есүгэн эхний тулаанаа Улаанбаатарын цагаар 18:36 минутад  Колумбын тамирчин Лорена Валенсиа Викториятай хийнэ.