Талийгаач дуучин Лиам Пэйний байрлаж байсан өрөөний зургуудыг ДЭЛГЭВ

Орон нутгийн цагаар лхагва гарагт "One Direction" хамтлагийн гишүүн асан Лиам Пэйн Аргентины Буэнос-Айрес дахь CasaSur Palmero зочид буудлын гурван давхараас унаж таалал төгссөн билээ.

Түүний байрлаж байсан өрөө эвдэрч, хэмхэрсэн зүйлсээр дүүрэн байсан ба хар тамхи, согтууруулах ундаа хөглөрч байсан тухай эх сурвалж мэдээлсэн байна. Аргентины хамгийн том сонин болох La Nacion-д нийтлэгдсэн гэрэл зургуудад хагарсан зурагт, оргилуун дарстай хундага, тугалган цаас болон кокаин байж болзошгүй цагаан нунтаг зэрэг харагдах аж. 

Талийгаачийг нас барахаас хэдхэн цагийн өмнө түүний өрөөнд хоёр эмэгтэй байжээ. Гэсэн ч тэд Лиам Пэйнийг нас барахаас өмнө түүний өрөөнөөс гарсан ба тухайн үед ажиллаж байсан гурван зочид буудлын ажилтныг уг хоёр эмэгтэйн хамт байцааж эхэлсэн байна. 

Мөн тус зочид буудалд амарч байсан нэгэн иргэн хэрэг болохоос өмнө талийгаачийн өрөөнд түжигнэх, хүмүүс хоорондоо зодолдож буй мэт чанга чимээ гарч байсан тухай ярьжээ.

Цагдаа нар анхан шатны шалгалтаар талийгаачийн биеэс биеэ хамгаалсан болон бусадтай тэмцэлдсэн ул мөр олоогүй хэмээн мэдээлсэн бөгөөд талийгаач амиа алдах үедээ мансууруулах бодис хэтрүүлэн хэрэглэсний улмаас биеэ хянах чадваргүй болж, улмаар тагтнаас унасан байж болзошгүй хэмээжээ.