Өмнөговь аймгийн 2024-2028 оны Иргэдийн төлөөлөгчдийн хурал (ИТХ)-ын анхдугаар хуралдаан өчигдөр (2024.10.24) 100 хувийн ирцтэйгээр хуралдлаа.
Анхдугаар хуралдааныг насаар хамгийн ахмад төлөөлөгч болох Өмнөговь аймгийн ИТХ-ын сонгуулийн 11 дүгээр тойрог, Ханхонгор сумаас сонгогдсон төлөөлөгч Б.Түвшинбаяр даргалан явуулав.
Хурлын үр дүнд Өмнөговь аймгийн ИТХ-ын даргаар О.Эрдэнэ-Өрнөх 88.5 хувийн саналаар сонгогдлоо.
О.Эрдэнэ-Өрнөх нь 1982 онд Өмнөговь аймагт төрсөн. Эдийн засагч мэргэжилтэй. МУИС-ийн Эдийн засгийн сургуулийг Эдийн засгийн онолын магистр, Английн Засгийн газрын тэтгэлгээр Йоркийн их сургуулийг Эдийн засгийн ухааны магистраар тус, тус төгсөж, эрдмийн зэрэг хамгаалсан. АНУ-ын Төрийн нарийн бичгийн дарга Дональд Рамсфелдийн нэрэмжит тэтгэлгээр тус улсад суралцсан. 2021-2023 онд Өмнөговь аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлстийн даргаар ажиллаж байжээ.
ИТХ-ын анхдугаар хуралдаанаар мөн Өмнөговь аймгийн Засаг даргаар Насанбуянгийн Энхбатыг төлөөлөгчдийн олонхын саналаар сонгож, Монгол Улсын Ерөнхий сайдад уламжлахаар боллоо.
Н.Энхбат нь 1985 онд Өмнөговь аймагт төрсөн. Эдийн засагч мэргэжилтэй. ХААИС-ийг Эдийн засаг, бизнесийн менежмент мэргэжлээр төгсөж, дараа нь Бизнесийн удирдлагын магистрын зэрэг хамгаалсан. 2013-2014 онд Удирдлагын академийг Төрийн удирдлагын менежмент мэргэжлээр төгссөн. 2014-2015 онд Англи улсын Оксфордод хэлний бэлтгэлд суралцан, Англи хэлний мэдлэгээ дээшлүүлсэн. 2018 онд Солонгос улсын Сөүл хотод Күүкмин Улс төрийн сургуульд Төрийн удирдлагын менежментээр мэргэжил дээшлүүлжээ. 2020-2023 онд Өмнөговь аймгийн Засаг даргын орлогч, 2023 оноос одоог хүртэл Өмнөговь аймгийн ИТХ-ын дарга, 2012 оноос Өмнөговь аймгийн ИТХ-ын төлөөлөгчөөр 4 дэх удаагаа сонгогдон ажиллаж байгаа түүнд ийнхүү итгэл хүлээлгэн, Өмнөговь аймгийн Засаг даргад олонхын саналаар дэмжлээ.
Сэтгэгдэл ( 0 )