Гаалийн байгууллагаас 13 хүний ХОМ-ийг шалгуулахаар АТГ-т хандлаа

Улаанбаатар хот дахь Гаалийн газрын улсын байцаагчдаас хөрөнгөөрөө тэргүүлдэг 13 байцаагчийн мэдээллийг хэвлэлүүд олон нийтэд дэлгэсэнтэй холбоотойгоор Гаалийн ерөнхий газраас мэдээлэл хийж, нэр дурдагдсан гаалийн байцаагчдыг Авлигатай тэмцэх газар (АТГ)-т шалгуулахаар болсон талаар мэдээллээ. 

Тодруулба, Гаалийн ерөнхий газрын Хуулийн хэлтсийн дарга Ч.Тамираа “Гаалийн байгууллагаас нэр бүхий 13 хүний Хөрөнгө орлогын мэдээллийг үнэн зөв, үндэслэлтэй эсэхийг шалгуулахаар АТГ-т албан тоот хүргүүлээд байна. Албаны дарга, гаалийн улсын ахлах байцаагч, улсын байцаагч зэрэг 13 хүний хөрөнгийн мэдээлэл зарим хэвлэл мэдээлэл, цахим сүлжээгээр цацагдсан. Эдгээр хүний хөрөнгө нь хууль бус хөрөнгө байгаа юм биш биз гэсэн хардлагын үүднээс сурвалжилга бэлтгэсэн байна гэж ойлгосон. Энэ мэдээллийг гаалийн байгууллага хүлээн авч, дотооддоо зохих ажиллагааг хийж байна. Үндэслэлгүйгээр хөрөнгөж эсэхийг нь тогтооно. Тангараг өргөсөн гаалийн байцаагч, бүх албан хаагч хуулийнхаа дагуу АТГ-т хөрөнгөө мэдүүлэх ёстой байдаг. Хөрөнгөө мэдүүлдэггүй нэг ч албан хаагч байдаггүй. Хэвлэлээр гарсан мэдээллийг хууль, хяналтын байгууллага шалгаж тогтооно. Гаалийн улсын байцаагчийн үндсэн цалин 1.4 сая төгрөгөөс эхэлдэг. Мөн үүн дээр урамшуулал нэмэгддэг. Гэхдээ тэрбумтан болох боломжгүй” хэмээн мэдээлэл хийлээ.  

ВИДЕО ХЭЛБЭРЭЭР ҮЗЭХ
 

Ийнхүү Гаалийн ерөнхий газраас АТГ-т хандсаны дагуу Гаалийн улсын ахлах байцаагч Б.Охиноо, Б.Солонго, Б.Төгсбаяр, Т.Дулмаа, Л.Долгормаа, улсын байцаагч Ж.Алтанчимэг, Ч.Байгалмаа, Д.Саранцэцэг, Х.Энхтуяа, Д.Цэцэгсүрэн, Ж.Булга нарын 11 хүний хөрөнгийг шалгахаар боллоо. Харин нийтлэлд дурдагдсан хоёр албан хаагч буюу Улаанбаатар хот дахь гаалийн газрын Хяналт шалгалтын албаны дарга Н.Уранчимэг, гаалийн улсын байцаагч Б.Отгончимэг нар ажлаасаа чөлөөлөгдсөн, тэтгэвэртээ гарсан гэх үндэслэлээр шалгуулах хүний нэрсээс хасагджээ.