Ч.Ундрахтуул: Манай нөхрийг барьж, хорилоо гээд дуугүй болох хүн биш

Өнгөрөгч есдүгээр сарын 16-ны өдөр Боловсролын сайд П.Наранбаяр багшлах эрхийн гэрчилгээ олгох, гэрээт багшийн талаар мэдээлэл хийх үеэр "Үнэн ба зөв" намын дарга А.Отгонбаатар сайд руу өндөг шидэж, хүмүүстэй маргаан үүсгэсэн үйлдэлтэй холбогдуулан "Үнэн ба зөв" намын дарга А.Отгонбаатарыг долоо хоногийн хугацаатай баривчлан хорьсон.

Үүнтэй холбогдуулан "Үнэн ба зөв" намын гишүүд болон түүний гэргий Ч.Ундрахтуул нар өнөөдөр /2024.12.25/ мэдээлэл хийлээ. 

Ч.Ундрахтуул "Миний нөхрийг баривчилсантай холбоотойгоор Хууль зүйн сайд О.Алтангэрэл болон шүүх, цагдаагийн байгууллагад хандах хэд хэдэн шаардлага байна. Боловсролын сайд П.Наранбаяр нь 45 хоногийн хугацаатай курсэд суусан хүнд багшлах эрх олгоё гэсэн журам баталсан. Үүнийг эсэргүүцэж өндөг шидсэн хэргээр долоо хоног баривчиллаа. Гэтэл төрийн тусгай хамгаалалт нэрийн дор хүн зодсон ХҮН намын Т.Отгонбаатарт ямар ял шийтгэл оноосон бэ, энэ хүн төрийн тусгай хамгаалалттай газар хүний биед халдсан, олон нийтийн сүлжээгээр хийсэн үйлдэл нь ил тод байхад ямар нэг шийтгэл оноосонгүй. Зодсон нь Төрийн ордонд ордог, зодуулсан нь шорон руу ачигддаг нийгэм бий боллоо.

"Цагдаагийн алба хаагчид үүргээ гүйцэтгэж байна" гэсэн нэрийн дор бусдыг зодож цохиж болдог юм уу. Төрийн цагдаад ёсзүй хэм хэмжээ байх ёстой. Ийм алдаа гаргасан хууль сахиулагчид ямар хариуцлага тооцох вэ. Манай нөхөр барьж хорилоо гээд дуугүй болох хүн биш. Харин манай улсад өндөг шидэхэд хорих ял оноох хууль эрхзүйн орчинтой юм бол дарангуйлал бий болж байна гэж үзэж байна. Тиймээс цаашдаа "Үнэн ба Зөв" намын эмэгтэй гишүүдтэй хамтарч, нийгмийн болж бүтэхгүй байгаа зүйлийн эсрэг дуугарч, тэмцэнэ гэдгээ илэрхийлье" гэж байр сууриа илэрхийллээ. 

Сүхбаатар дүүргийн Эрүүгийн хэргийн анхан шатны шүүхээс баривчлах шийтгэл оноожээ. А.Отгонбаатарт Зөрчлийн тухай хуулийн 5.2-1.1, 5.2-1.2, 5.2-1.3, 5.2-1.4 дэх хэсгийн олон нийтийн газарт хэрүүл маргаан үүсгэж, бусдыг өдөөн хатгаж, амгалан тайван байдал алдагдуулж, олон нийтийг үл хүндэтгэж танхайрсан хэмээн албадан сургалтад хамруулан, долоо хоног баривчлах шийтгэл оноосон байна. Улмаар шүүхийн шийтгэврийн дагуу ШШГЕГ-ын харьяа Баривчлах байранд хүргэж, шийтгэлийг нь эдлүүлж эхэлжээ.

ШУУД ҮЗЭХ