Нийслэлийн төсвийн өөрчлөлт 24 мега төслийг дэмжихэд чиглэнэ

Нийслэлийн ИТХ-ын ээлжит бус V хуралдаан энэ долоо хоногт болсон билээ. 

Хуралдаанаар,
 

• Нийслэлийн 2025 оны төсөвт нэмэлт, өөрчлөлт оруулах тухай
• Нийслэлийн 2025 оны газар зохион байгуулалтын төлөвлөгөөнд нэмэлт, өөрчлөлт оруулах тухай
• Нийслэлийн өмчөөс 2025 онд хувьчлах эд хөрөнгийн жагсаалт батлах тухай
• Хуулийн этгээдийн хувьцаа шилжүүлэн авах тухай
• Улаанбаатар хотын орон сууцны эрчим хүчний үр ашгийг дээшлүүлэх төсөлд хамрагдах айл өрхийн эргэн төлөлтийн хувь хэмжээг тогтоох тухай
• Зөөврийн ус түгээх барилга байгууламжийг нийслэлийн өмчид бүртгэх тухай
• Чингэлтэй дүүргийн 327 дугаар цэцэрлэгийн барилга байгууламжийг нийслэлийн өмчид бүртгэх тухай
• Орон сууцны барилгын инженерийн шугам сүлжээ, тоног төхөөрөмжийг нийслэлийн өмчид бүртгэх тухай
• Өрхийн эрүүл мэндийн төвийн барилгыг нийслэлийн өмчид бүртгэх тухай
• Сүм, хийдийн үйл ажиллагаа явуулах зөвшөөрлийн хугацаа сунгах тухай зэрэг асуудлыг хэлэлцсэн юм. 

Хуралдааны эхэнд Улаанбаатар хотын 2025 оны төсөвт тодотгол хийх тухай тогтоолын төслийг хурадаанд оролцсон нийт төлөөлөгчдийн олонхын саналаар дэмжиж баталсан.

Тодруулбал, Нийслэлийн 2025 оны төсвийн орлогын нийт дүн 1 их наяд, 688 тэрбум төгрөг байхаар өөрчилж, Үүнээс татварын орлого нэг их наяд 80 тэрбум 723 сая төгрөг байх бол татварын бус орлого 583 тэрбум 770 сая төгрөг байхаар тусгажээ. Эндээс орон нутгийн сангийн орлогын шилжүүлэг 24.1 тэрбум төгрөг байхаар тус тус тусгажээ. Харин төсвийн нийт жилд зарцуулах зарлагын хэмжээг 5 их наяд 773 тэрбум байхаар баталсан юм.

Нийслэлийн 2025 оны төсөвт нэмэлт өөрчлөлт оруулах тухайд, Нийслэлийг хөгжүүлэх 24 мега төсөл хэрэгжүүлэхтэй холбоотой, төсвийн сахилга хариуцлагыг сайжруулах хүрээнд  өөрчлөлт оруулж байгааг төсөв санаачлагчид онцоллоо.