ХЭН ЮУ ХЭЛЭВ | ХҮН нам ЗГ-тай хамтраагүй бол хүчтэй СӨРӨГ ХҮЧИН байх байсан

Энэ дугаарын “Хэн юу хэлэв” буланд УИХ-ын гишүүн, Тэргүүн Шадар сайд, АН-ын дарга Л.Гантөмөр, УИХ-ын гишүүн, Шадар сайд, ХҮН намын дарга Т.Доржханд, УИХ-ын гишүүн, Хууль зүй дотоод хэргийн сайд О.Алтангэрэл нарын үгийг онцолж байна.

УИХ-ын гишүүн, Тэргүүн Шадар сайд, АН-ын дарга Л.Гантөмөр:

-Бид С.Зориг агсныхаа үгээр явж ирсэн. Монголын эрх ашгийг нэгдүгээрт тавья. Намынхаа эрх ашгийг хоёрдугаарт тавья, харин хувь хүний эрх ашгийг гуравдугаарт тавья гэж зорьж ажилласан. Миний хувьд хамтарсан Засгийн газраас хэзээ ч урвахгүй гэдэг байр суурьтай байна. АН өнөөдрийг хүртэл энэ байр суурин дээрээ байж чадсан. Хамгийн гол нь Монголчууд ядуу хэвээрээ, Улаанбаатар хот утаатай чигээрээ үлдвэл үүнд хэн хариуцлага хүлээх вэ гэдэг асуудал байгаа. Бид итгэл үнэмшлээрээ хамтарсан шүү дээ. Энэ итгэл үнэмшил Монгол Улсын эрх ашигт байна. Харин улсынхаа эрх ашгаас урвасан бол эвсэл задрах ёстой. Хамтарсан засаг тарах хэрэгтэй.

УИХ-ын гишүүн, Шадар сайд, ХҮН намын дарга Т.Доржханд:

-Хамтарсан Засгийн газрыг байгуулах нь Монгол Улсын эрх ашиг юм байна. Ингэхгүй бол Монгол хөгжихгүй юм байна гэж Үндсэн хуулийн нэмэлт өөрчлөлтийг санаачилж, 21 аймгаар гурван удаа тойрсон. Үр дүнд нь нийт монголчуудын 50 гаруй хувь нь дэмжиж, Үндсэн хуулийн өөрчлөлтийг хийсэн. Ардчилсан намын удирдлага 2023 онд солигдож, хэлцэлд хүрч, улсаа хөгжүүлэхийн төлөө бие биедээ дэгээ тавьдаг бус, хоёр нам хоорондоо хэрэлддэг тогтолцоог халъя гэсэн. Үүний үр дүнд хамтарсан Засгийн газар байгуулагдсан. Хамтарсан Засгийн газарт ХҮН нам ороход сөрөг хүчин байх ёстой гэж шүүмжилдэг. Хэрвээ ХҮН нам Засгийн газартай хамтраагүй бол хүчтэй сөрөг хүчин байх байсан. Магадгүй орон нутагт олон суудал авах байсан нь үнэн. Энэ бол ХҮН намын эрх ашиг. Тэрнээс Монгол Улсын эрх ашиг биш байсан.

Хууль зүй дотоод хэргийн сайд О.Алтангэрэл:

-Өргөн мэдүүлээд байгаа  Нийтийн албан тушаалтны хөрөнгө хураах тухай хуулийн төсөл бол зөвхөн хөрөнгө хураах тухай зохицуулалт биш авлигын эсрэг багц хуулийн төсөл юм. Хуулийн процессын хувьд 2002 оноос эхлэн үйлчлэхээр тусгасан. 2002 оноос хойш эрүүгийн хэрэгт яллагдагчаар татагдаж байгаад шалгагдаж өршөөгдсөн хүмүүс байна. Шүүхээр ороод авлигын хэрэгт ял авсан атлаа хөрөнгөө хураалгаагүй хүмүүс байна. Ямар нэг эрүүгийн хэрэгт буруутгагдаж, шүүхийн шийдвэр гараагүй боловч хөрөнгөө тайлбарлаж чадахгүй хүмүүс байна. Эдгээр хөрөнгүүдийг шүүхээр хураая, гэхдээ иргэний шүүхийн журмаар хураая, бүх процессуудаа хийе гэдэг өөрчлөлт оруулж байна. Энэ хуулийн зохицуулалтад хорих ял оруулаагүй, ял шийтгэлгүй, хөрөнгө нь хураагдана гэсэн үг.