Эрх зүйн шинэчлэлээр ногоон хөгжлийн суурийг бэхжүүллээ
Засгийн газрын эхний 100 хоногт байгаль орчин, уур амьсгалын өөрчлөлтийн салбарт эрх зүйн цогц шинэчлэлийн суурийг тавьж, хөгжлийг хурдасгах томоохон өөрчлөлтүүдийг эхлүүллээ.
Уур амьсгалын өөрчлөлтийн тухай анхдагч хууль батлагдав. Үндэсний бодлого, хүлэмжийн хийн ялгарлыг бууруулах, дасан зохицох, уур амьсгалын санхүүжилт, карбон зах зээлийн эрх зүйн орчин бүрдэв. Байгаль орчинд нөлөөлөх байдлын үнэлгээний тухай хуулийн шинэчилсэн найруулга батлагджээ.
Түүнчлэн, үнэлгээний үйл ажиллагаа бүрэн цахимжиж, шат дамжлагыг цөөрүүлснээр шийдвэр гаргах хугацаа 250 хоногоос 53 хоног болсон зэрэг бодит үр дүн гарах суурь бүрдээд байна.
Мөн Тусгай хамгаалалттай газар нутгийн тухай хуулийн шинэчилсэн найруулга батлагдаж, байгаль хамгаалалтын менежментийг олон улсын жишигт нийцүүлэн боловсронгуй болгож, орон нутгийн оролцоо, тогтвортой ашиглалт, хамгааллын үр нөлөөг шинэ шатанд гаргах эрх зүйн үндэс бүрджээ.
Өнгөрсөн 100 хоногийн хугацаанд "Ойн тухай" хуулийн шинэчилсэн найруулгыг УИХ-д өргөн мэдүүллээ. Хууль батлагдсанаар ойг эдийн засгийн эргэлтэд оруулах, нүүрстөрөгчийн зах зээлийг хөгжүүлэх, салбарын шинэ эрх зүйн орчныг бүрдүүлэх ажлыг эхлүүлэв.
Засгийн газрын эхний 100 хоногт зөвхөн хууль эрх зүйн орчныг шинэчлээгүй. Байгаль хамгааллыг илүү үр дүнтэй, хөрөнгө оруулалтыг илүү ээлтэй, ногоон хөгжлийг илүү тогтвортой болгох эрх зүйн шинэ тогтолцооны суурийг тавилаа.
Сэтгэгдэл ( 0 )