Хамгийн анхны диско клуб Whisky a Go Go

Одоогоос 48 жилийн өмнөх яг энэ өдөр дэлхийн хамгийн анхны диско клуб Whisky a Go Go АНУ-ын Чикаго хотын Сансет бульварт нээгджээ. Уг нь бол пиво баар маягаар Rush Street-д 1958 оноос үйл ажиллагаа явуулж эхэлсэн ч 1963 онд Сансет Бульварт нээсэн шинэ салбарыг нь албан ёсоор дэлхийн хамгийн анхны диско клуб гэж үздэг юм. Жоанна Лэбиний урласан цагаан гутал, богино даашинзтай бүжигчид нь хожмоо Go Go Girl гэж алдаршсан бол Whisky a Go Go нэр нь брэнд болж, дэлхийн олон оронд салбарлажээ. Гэрэлтүүлэг бүхий шилэн шал ч энд анх тавигдаж, одоо та бидний сайн мэдэх болсон DJ хэмээх мэргэжил энд анх үүссэн юм. Хилийн чанад дахь хамгийн анхны Whisky a Go Go 1966 онд Тель Авивын хуучин боомтод нээгдсэн бол удалгүй Австралид Whisky au Go Go нээгдэж, улмаар хөгшин тивд салбарласан байна. Энэ нэр хөгжмийн ертөнцтөй салшгүй холбоотой. Нирвана,  The Byrds, Alice Cooper, Buffalo Springfield, Oasis зэрэг хамтлагууд өөр өөрсдийн ойролцоох Whisky-гээс алдрын замналаа эхлүүлсэн юм. үүний хариуд алдарт Rolling Stones тэргүүтэй үе үеийн хамтлаг Whisky-д зориулж дуу зохиожээ.      

С.Төгөлдөр