Ш.Чоймаа профессорын бүтээл олны хүртээл болов

МУИС-ийн “Профессорын эрдмийн өв” цувралаар Монгол Улсын Төрийн шагналт, Ардын багш, Хэл шинжлэлийн шинжлэх ухааны доктор, профессор Шаравын Чоймаагийн эрдэм шинжилгээний өгүүллийн чуулганы эхний хоёр боть хэвлэгдэн гарч олны хүртээл боллоо.

Ш.Чоймаа профессорын бүтээл “Монгол сурвалж судлал” I ботид Эзэн богд Чингис хаан, Монголын нууц товчоо, Их засаг, Цагаан түүх, Юань улс, Их хаадын бичгүүд, Хураангуй Алтан товч, Хөх судар, Увш хун тайж, Хорчойнжүн судлалын сэдвээр бичсэн 34 өгүүлэл багтсан бол “Монгол хэл, бичиг, соёл судлал” II ботид Монголын нууц товчооны хэл судлалаас эхлэн монгол хэл судлалын сэдвүүдээр бичсэн 54 өгүүлэл нь оржээ.

Номын нээлтийг МУИС-ийн шинэ номын санд зохион байгуулсан бөгөөд “Профессорын эрдмийн өв” хөтөлбөр нь эрдэмтдийнхээ шинжлэх ухааны бүтээлийг хэвлэн нийтэлж “МУИС пресс” номын дэлгүүртээ худалдаалж эхэлсэн нь залуу судлаачдад төдийгүй уншигчдад онцгой ач холбогдолтойг эрдэмтэд онцоллоо.