ХЯНАЛТ 3# | Сонгинохайрхан дүүргийн 23 дугаар хорооны хүүхдүүд шинэ сургуультай болно

Засгийн газар болон Боловсрол, соёл, шинжлэх ухаан, спортын яам /БСШУСЯ/  хамтран “Сургуулийн III ээлжийг II ээлжид шилжүүлэх, хүүхэд бүрийг цэцэрлэгт хамруулах зорилт”-ыг дэвшүүлж, энэ онд орон даяар нийт 603 төсөл  хэрэгжүүлэхээр төлөвлөжээ.

“Өглөөний сонин”-ы сурвалжлах баг боловсролын салбарт хийгдэж буй Сонгинохайрхан дүүрэг дэх бүтээн байгуулалтын ажил, гүйцэтгэлийн үйл явцыг цувралаар сурвалжлан хүргэж байгаа билээ. Нийт 26 сургууль, цэцэрлэгийн барилгын ажилтай танилцах бөгөөд өнөөдрийн дугаарт 23 дугаар хороонд шинээр баригдсан 640 хүүхдийн суудалтай 143-р сургуулийн барилгын ажлын явц, гүйцэтгэлтэй  танилцсанаа хүргэж байна.

СУРГУУЛЬ БАЙХГҮЙ УЧИР ХҮҮХДҮҮД ӨӨР ХОРООНЫ ГУРВАН СУРГУУЛЬД ХУВААГДАН СУРАЛЦДАГ БАЙЖЭЭ

Биднийг очиход дөрвөн давхар сургуулийн гадна, дотно бүх өрлөг дууссан хоёр, гурван давхрын дотор ханын өнгөлгөө хийгдэж байлаа. Энэхүү барилга дээр одоогийн байдлаар 40 гаруй хүний бүрэлдэхүүнтэй ажилчид ажиллаж байна гэж “Хүрэл ордон” ХХК-ний захирал н.Батболд хэллээ. Барилгын санхүүжилт хэвийн явагдаж байгаа учраас барилгыг цаг тухайд нь болж өгвөл хугацаанаас нь өмнө хүлээлгэж өгөхөөр төлөвлөж байгаагаа мөн ярилаа.

Нийслэлийн хамгийн олон хүн амтай Сонгинохайрхан дүүрэгт Төрийн өмчийн 19, төрийн бус өмчийн долоон сургууль, нийт 26 сургууль үйл ажиллагаа явуулдаг. Дүүргийн хэмжээнд Ерөнхий боловсролын сургуульд хамрагдвал зохих насны 44003 хүүхэд байдаг. Харин 23 дугаар хороонд сургууль байхгүй учраас тус хорооны 2500 гаруй хүүхэд 9, 62 дугаар сургуульд болон “Ирээдүй” цогцолбор сургуульд хуваагдан суралцдаг байжээ. Өөр хорооны сургуульд, гурван ээлжээр хичээллэж байгаа тус хорооны хүүхдүүд энэ хичээлийн жилд 640 хүүхдийн суудалтай шинэ сургуультай болох гэж байна. Нийслэлийн засаг даргаас улсын дугаараа аваад удаагүй байгаа 23 дугаар хорооны 143-р сургуулийн барилга өнгөрсөн оны 10 дугаар сараас хойш эхэлж баригдаж, өнөөдрийн байдлаар 70 хувийн гүйцэтгэлтэй байна.

Барилгын ажлыг “Хүрэл ордон” ХХК гүйцэтгэсэн бөгөөд энэ оны наймдугаар сарын 10-ны дотор хүлээлгэж өгөхөөр төлөвлөжээ. Энэ талаар “Хүрэл ордон” ХХК-ний Бригадын даамал М.Энэбиш “Одоогийн байдлаар барилгын үндсэн бүтэц болох бүх өрлөг дууссан. Цахилгааны ажил 70-80 хувьтай, сангийн ажил 80 хувьтай, дотор заслын ажил 60 хувьтай, гадна тохижилтын ажил эхлэх шатандаа явж байна” гэлээ. Дээрх 640 хүүхдийн суудалтай 143 дугаар сургуулийн барилгыг 4.6 тэрбум төгрөгөөр барихаар төсөвт тусгагджээ.

Энэ онд нийслэлд есдүгээр сарын 1-ээс өмнө 13, арван хоёрдугаар сарын 30-аас өмнө 11 гээд нийт 24 сургуулийн барилга шинээр ашиглалтад орно. Ингэснээр нэг ээлжид 10300 хүүхдийн суудлын тоо шинээр нэмэгдэж байгаа юм.

23 дугаар хорооны 143 дугаар сургуулийн барилгыг барьж байгаа “Хүрэл ордон” ХХК шиг сургууль, цэцэрлэгийн барилгыг барьж байгаа гүйцэтгэгч компаниуд ажил үүргээ цаг тухайд нь хүлээлгэж өгөөд байвал гурван ээлжээр хичээллэж буй сургуулийн сурагчид, ирэх жилүүдэд нэгдүгээр ангид шинээр элсэх бяцхан хүүхдүүд ая тух, аюулгүй орчинд суралцах бүрэн боломжтойг онцлон хэлмээр байна. 

Эх сурвалж: ӨГЛӨӨНИЙ СОНИН