Оюутан, залуучуудын дунд спортын таван төрөлтийн тэмцээн явагдаж байна

Нийслэлийн 380 жилийн ойн хүрээнд нийслэлийн Засаг даргын ивээл дор энэ сарын 20-оос аравдугаар сарын 23-ны хооронд Оюутан, залуучуудын дунд волейбол, сагсан бөмбөг, дугуй, шатар, бүх нийтийн гүйлт зэрэг таван төрлөөр, нийслэлийн иргэдийн дунд явган аялал, ширээний шагайн наадгай, хийн дасгал, аэробик, олс таталт, софт волейбол, волейбол, сагсан бөмбөгийн төрлөөр спортын тэмцээн зохион байгуулж байна.

Оюутан, залуусын спортын таван төрөлт тэмцээний урьдчилсан тоглолтуудыг энэ сарын 25-ны өдрөөс өмнө бүсчилэн зохион байгуулсан юм. Нийслэлийн шигшээ тэмцээнийг сагсан болон гар бөмбөгийн төрлөөр энэ сарын 30-аас аравдугаар сарын 2-ныг дуустал “Буянт-Ухаа” спортын ордонд зохион байгуулаж байна. Сагсан бөмбөгийн тэмцээнд 16 сургуулийн 224 оюутан, гар бөмбөгийн тэмцээнд 12 сургуулийн 180 оюутан оролцохоор мэдүүлгээ өгөөд байна.

Дугуйн тэмцээн болон бүх нийтийн гүйлтийг аравдугаар сарын 12-ны өдөр Хөшигтийн хөндийн хурдны зам дээр, Шатрын тэмцээнийг мөн ирэх сарын 12-13-ний өдрүүдэд “Аврагч” спорт хорооны зааланд тус зохион байгуулна.

Нийслэлийн иргэдийн спортын наадам нь хэсэг, хороо, бүс, дүүрэг, нийслэл гэсэн 5 үе шаттайгаар 8 төрлөөр зохион байгуулагдана. Нийслэлийн иргэдийн спортын наадмын анхан шатны тэмцээнүүд энэ сарын 20-оос өмнө зохион байгуулагдсан. Ирэх сарын 5-20-ны хооронд урьдчилсан тоглолтууд явагдана. Нийслэлийн шигшээ тэмцээний нээлтийн арга хэмжээг аравдугаар сарын 21-ний өдөр “Буянт-Ухаа” спортын ордонд зохион байгуулах юм.

Эх сурвалж: НИЙСЛЭЛИЙН СПОРТЫН ХОРОО