С.Зориг, Д.Нацагдорж, Б.Явуухулангийн хөшөөнд зөвшөөрөлгүй байрлуулсан “хөшөө”-г шилжүүлнэ

Төр нийгмийн зүтгэлтэн С.Зориг, их зохиолч Д.Нацагдорж, яруу найрагч Б. Явуухулангийн хөшөөний дэргэд зөвшөөрөлгүйгээр байрлуулсан хүүхдийн хөшөөг шилжүүлэхээр болжээ. Тухайлбал, “Улсын нийслэлд хөшөө, дурсгал хүндэгэлийн самбар байрлуулах журам”-ын 2.1, 2.2 заалтыг тус тус зөрчсөн тул дээрх зөвшөөрөлгүй хөшөөнүүдийг албадан шилжүүлэхийг холбогдох газруудад мэдэгдсэн тухай НЗДТГ-аас мэдээллээ.

НИТХ-ын Тэргүүлэгчдийн 2010 оны 3 дугаар сарын 31-ний өдрийн 55 дугаар тогтоолоор “Улсын нийслэлд хөшөө, дурсгал хүндэтгэлийн самбар байрлуулах журам”-ыг баталсан байдаг. Үүнд, “Тухайн улс орон, бүс нутгийн соёл урлаг, түүхэн үйл явдлыг харуулсан, оюун сэтгэлгээний хөгжлийн илэрхийлэл болсон, архитектур, дүрслэх урлагийн шийдэл бүхий байгууламжийг хөшөө” гэж нэрлэхээр тусгажээ.