Сурвалжилга: Үүрийн 06.30 цагаас эхний "Хүүхдийн автобус" хөдөллөө

-Нийслэлийн Засаг даргаас өгсөн чиглэлийн дагуу өнөөдрөөс нийт 29 сургуулийг зорих 33 чиглэлд 40 хүүхдийн автобус явж эхэллээ-

“Чингис хаан” нисэх онгоцны буудлын замын эсрэг талын “Буянт Ухаа I” хорооллын автобусны буудлаас “Сутайн буянт” компанийн С:9 чиглэлийн автобус үүрийн 06.30 цагаас хөдөллөө.

Нийт найман хүүхдийг ойролцоох буудлуудаас тээвэрлээд Таван богдын буудал дээр 75 дугаар сургуулийн сурагчдыг, Механик инженерийн сургуулийн буудал дээр 18 дугаар сургуулийн сурагчдыг, Жаргалант төвийн буудал дээр 15 дугаар сургууль, Дунд голын нэгдүгээр буудал дээр 52 дугаар сургуулийн сурагчдыг буулгасан юм. Хүүхдүүдийг хичээл орохоос өмнө буюу өглөөний 08.00 цагаас өмнө сургууль дээр хүргэж өгөх байсан боловч 08.17 минутад сүүлийн сургууль дээр сурагчдыг хүлээлгэж өглөө.

Сурагчдыг сүүлийн сургууль болох 52 дугаар сургуулийн захирал, нийгмийн ажилтан тосож авсан бөгөөд Нийтийн тээврийн үйлчилгээний газар, нийслэлийн Боловсролын газар, сургуулийн нийгмийн ажилтан, автобус компаниас хяналтын ажилтнууд эхлэх цэгээс зогсох цэг хүртэлх нөхцөл байдлыг ажиглаж хамт явсан юм.

Хүүхдийн автобус явж эхэлж байгаа туршилтын эхний өдөр учраас зарим автобус нэг хүүхэдтэй ч сургуульдаа ирж байв. Эцэг, эхчүүдэд мэдээлэл бага хүрсэн бололтой.

“Буянт Ухаа I” хороолол, Нисэх, Яармаг орчмоос хотын төв рүү сургуульдаа явдаг олон сурагч байгаа. Тэд ихэвчлэн хичээл орохоос нэг цаг 20 минутын өмнө гэрээсээ гардаг, томчуудтай хамт нийтийн тээвэрт шахцалдаж, суух суудал ч хүрэлцдэггүй гээд асуудлуудтай тулгардаг. Нисэх орчмоос төв рүү явахад VIVA CITY хороолол, Яармагийн орчим дахь хувийн сургуулиудын ойролцоо түгжрэл их үүсдэг.

Цаашлаад "Эрэл"-ийн буудлаас "Таван богд" компани хүртэл заримдаа машин явахгүйгээр хэдэн минутаар ч хамаагүй гацаад зогсоно. Хэдэн цагаас ажил, сургуульдаа очихоо таамаглахад хэцүү өдрүүдийг иргэд бид, ялангуяа улсын ирээдүй болсон балчир үрс маань туулсаар байх уу.
 

“Нийслэлийн Засаг даргаас өгсөн чиглэлийн дагуу өнөөдрөөс нийт 29 сургуульд 33 чиглэлд 40 хүүхдийн автобус явж эхэллээ” гэдгийг Нийтийн тээврийн үйлчилгээний газрын орлогч дарга Д.Мөнхбаатар хэлж байна. Мэдээж ЕБС-ийн хоёроос тавдугаар ангийн сурагчдыг хүүхдийн автобусаар тээвэрлэх нь олон талын ач холбогдолтой. Гэвч сайжруулах асуудлууд байсаар байгааг нийтийн тээврийн үйлчилгээний талаар хамгийн сайн мэдэх жолооч, сурагчид, сургуулийн ажилчид хэлж байна.

Энэ талаар дэлгэрэнгүй сурвалжилгийг “Өглөөний сонин”-ы арваннэгдүгээр сарын 18 буюу Даваа гарагийн дугаараас уншина уу.