Шилдэг багш Ц.Аюушийг 100 сая төгрөгөөр урамшууллаа

Боловсрол, соёл, шинжлэх ухаан, спортын сайд Ё.Баатарбилэгийн санаачилгаар зохион байгуулсан “Би багш” уралдаант нэвтрүүлгийн төгсгөлийн шатны шалгаруулалт өчигдөр /2019.12.21/ болж, Монгол Улсын шилдэг багшаар Сэлэнгэ аймгийн Мандал сумын III сургуулийн багш Ц.Аюуш шалгарч, 100 сая төгрөгийн шагналын эзэн боллоо. Шилдэг дөрөвт Ц.Наранчимэг, Ц.Аюуш, Л.Энхжаргал, Н.Бадамсүрэн нарын багш нар шалгарч үлдээд байсан юм.

Багшийн үнэлэмж, ур чадварыг нэмэгдүүлэх зорилготой нэвтрүүлгийг Боловсрол, соёл, шинжлэх ухаан, спортын яам, “Боловсрол суваг" телевизтэй хамтран зохион байгуулсан юм.
 

Төслийн санаачлагч, Боловсрол, соёл, шинжлэх ухаан, спортын сайд Ё.Баатарбилэг "Би багш" төслийн талаар "Багш... Сайн байлаа багш нар аа, та нар маань хичээж оролцлоо, багшийн ажил ямар хариуцлагатайг, багшийн ажил ямар чимхлүүрийг, багшийн ажил ямар их цаг зав шаарддагийг багахан боловч харууллаа, бас багш нар маань хичээлээ сайн заахын тулд хэр их бэлтгэл хангадгийг, санаа зовинол тээдгийг чимххэн боловч үзүүллээ, багш нар бие биенээсээ тодорхой хэмжээнд суралцлаа, мэдлэг, туршлагаа хуваалцлаа... сайн байлаа та нар маань, багшийн мэргэжил ямар сайхныг, багш хэмээх хүмүүн ямар эрхэм нэгэн болохыг бас мэдрүүллээ... Та нар чадлаа... Монголын багш нарын яруу алдар бадартугай" хэмээн сэтгэгдлээ хуваалцжээ.