Ё.Баатарбилэг: ЕБС-ийн хичээлийг 2020.06.13-ныг дуустал хичээллүүлнэ

Улсын онцгой комиссын хуралдаан дууслаа. /2020.03.20/ 

Улсын Онцгой комиссоос Өндөржүүлсэн бэлэн байдлын зэрэглэлийг болон ЕБС, цэцэрлэг, их, дээд сургуулиудын хөл хорио, хил, боомтууд, бүх нислэгийг дөрөвдүгээр сарын 30-ныг хүртэл хязгаарлах шийдвэр гаргалаа.

Засгийн газрын тогтоол гарч, энэ шийдвэрийг албажуулна. 

Шинэ коронавирусний халдвараас сэргийлэх үүднээс өмнө нь 2020 оны гуравдугаар сарын 30-ны өдрийг хүртэл их, дээд сургууль, Ерөнхий боловсролын сургууль болон цэцэрлэгт хөл хорио тогтоосон. Тэгвэл өнөөдрийн Улсын онцгой комиссын хуралдаанаар ийнхүү Өндөржүүлсэн бэлэн байдлын тогтоосон зэрэглэлийг үргэлжүүлж, одоо мөрдөж буй хорио цээрийн дэглэмийг 2020 оны дөрөвдүгээр сарын 30-ны өдрийг хүртэл сунгах шийдвэр гаргасан юм. 

Энэ талаар Боловсрол, соёл, шинжлэх ухаан, спортын сайд Ё.Баатарбилэг "2020 оны нэгдүгээр сарын 27-ноос гуравдугаар сарын 30-ны өдрийг хүртэл хичээл, сургалтын үйл ажиллагааг сунгасан шийдвэрийг дөрөвдүгээр сарын 30-ны өдөр хүртэл сунгалаа. Өнгөрсөн хугацаанд нийтдээ цэцэрлэгийн 500 цаг, Ерөнхий боловсролын сургуулийн 1146 цагийн хичээлийг өргөн нэвтрүүлгийн 18 телевизээр гаргасан. 

Одоогийн байдлаар дэлхийн 114 улс орон цэцэрлэг, сургуулийнхаа үйл ажиллагааг зогссож, 896 сая хүүхэд хорио цээрийн дэглэмд орсон байгаа. 

Сургууль, цэцэрлэгийн хөл хориог сунгасантай холбоотой дараах зохицуулалтыг хийнэ.
 

• Дөрөвдүгээр сарын 30-ны өдрийн пүрэв гаригаас эхэлж хичээл орно. 
   
• ЕБС-ын бага ангийг 2020 оны зургаадугаар сарын 6-ны өдрийн бямба гариг хүртэл, дунд, ахлах ангийг 2020 оны зургаадугаар сарын 13-ны бямба гаригийг дуустал хичээллүүлнэ. 
   
• Цэцэрлэгийн үйл ажиллагааг 2020 оны тавдугаар сарын 31-ний өдрөөр дуусгавар болгоно. 
   
• ЕБС-ийн сурагчдыг тав, зургаадугаар саруудад долоон удаа бямба гаригт хичээллүүлэхээр шийдвэрлэлээ. 
   
• Их, дээд сургуульд элсэх ЭЕШ-ыг сонгуулийн дараа буюу 2020 оны долоодугаар сарын 2-ны өдөр эхлүүлж, долоодугаар сарын 5-ны өдөр дуусгавар болгоно. 
   
• Их, дээд сургуулийн элсэлтийг 2020 оны долоодугаар сарын 7, 8-ны өдрүүдэд зохион байгуулна. 
   
• Энэ жилийн их, дээд сургуулийн үйл ажиллагааг зургаадугаар сарын 15-ныг хүртэл үргэлжлүүлнэ. 
   
• Ирэх намар их, дээд сургуулийн хичээлийн жил наймдугаар сарын 15-ны өдрийн Даваа гаригт эхэлнэ. 
   
• ЕБС, цэцэрлэгийн хичээлийг есдүгээр сарын 1-нээс эхлүүлэхээр хичээлийн жилийн бүтцэд зохицуулалт хийсэн. 
   
• Багш нарын амралтын 48 хоногт ямар нэгэн өөрчлөлт оруулахгүйгээр зохицуулалт хийсэн бөгөөд ЕБС-ын багш нарын ээлжийн амралт 2020 оны зургаадугаар сарын 15-ны Даваа гаригаас эхэлж, наймдугаар сарын 24-ний Даваа гаригт ажил орно" гэв. 

Үргэлжлүүлэн тэрбээр "Манай салбарт багтдаг соёл урлагийн нэгдсэн арга хэмжээ, тоглолтууд олон улсын болон улсын аварга шалгаруулах тэмцээнүүд эхний хагас жилд бүрэн зогсоосон. Зөвхөн олимпод бэлтгэх зорилготой улсын шигшээ багийн дөрвөн төрлийн тамирчдын бэлтгэл сургуулилтыг онцгой горимоор, Улсын онцгой комиссын шийдвэрийн онцгой дэглэмтэй орчин нөхцөлд бэлтгэл хангах ажил явна.

Шинжлэх ухааны байгууллагууд нэгдсэн сургалт, семинар зохион байгуулахгүйгээр судалгаа , шинжилгээний ажлаа үргэлжлүүлнэ” гэсэн юм. 

Үүний дараа Улсын онцгой комиссын дарга Ө.Энхтүвшин “Ё.Баатарбилэг сайдын хэлж буй зүйл бол 2020 оны дөрөвдүгээр сарын 30-нд өндөржүүлсэн бэлэн байдлыг зэрэг шилжүүлсэн хугацаа дуусна гэж тооцож байгаа үед ийм зохицуулалт хийхээр төлөвлөж байна. Нөхцөл байдал амаргүй хэвээр байвал цаашдаа хугацаа сунгахыг үгүйсгэхгүй” гэв.