Чингис хааны музейг 53 тэрбум төгрөгөөр хоёр жилийн хугацаанд барина

Анх 1955 онд үүд хаалгаа нээж байсан Байгалийн түүхийн музейг Мэргэжлийн хяналтын ерөнхий газраас гаргасан дүгнэлтийн дагуу 2013 онд хаасан билээ. Дүгнэлтэд “Байгалийн түүхийн музейн 1955 онд баригдсан барилга ослын байдалд байна. Ашиглаж болохгүй  түвшинд байна” гэдгийг дурдсан байдаг. 

2019 оны долоодугаар сарын 3-ны өдрийн Засгийн газрын шийдвэрийн дагуу ашиглалтын шаардлага хангахаа больсон Байгалийн түүхийн музейн хуучин барилгыг нурааж, суурин дээр нь “Чингис хааны түүх соёлын хүрээлэн” музей барихаар болсон. Харин Байгалийн түүхийн музейн шинэ барилгыг Их тэнгэрийн аманд барихаар болсон юм. 

Тэгвэл Монгол Улсын Ерөнхий сайдын санаачилгаар хэрэгжиж буй "Чингис хааны түүх соёлын хүрээлэн" музейн бүтээн байгуулалтын ажил эхэллээ. /2020.04.02/

Бүтээн байгуулалтын нээлтэд Монгол Улсын Ерөнхий сайд У.Хүрэлсүх оролцлоо. 

Тэрбээр "Өнөөдөр монгол түмний хувьд түүхэн өдөр тохиож байна. Монгол туургатны эх түүх, үндэсний соёлыг бататган эзэн Чингис хаанаараа овоглосон энэхүү музей нь түүх соёл, оюуны эх орд болно. Чингис хааны музейгээр дамжуулан үр хойчдоо эх түүхээ өвлүүлэн үлдээж байна. Хүчин зүтгэсэн бүх хүмүүст, дэмжиж тусалсан ард иргэддээ Монгол Улсын Засгийн газрын өмнөөс талархъя. Өнөөдөр сайн цагийн эхлэл, сайн үйлийн үргэлжлэл болгож, чингис хааныхаа музейн бүтээн байгуулалт ийнхүү эхэлж байна" гэв. 

Түүнчлэн "Музейн барилга дээшээ есөн давхар, доошоо нэг давхар байх бөгөөд хоёр жилийн хугацаанд баригдаж дуусна. 2020-2021 оны улсын төсөвт 53 тэрбумын хөрөнгө оруулалт тусгагдсан. Санхүүжилт гацах зэрэг асуудал үүсэхгүй. Бид үр хүүхдэдээ түүхээ үлдээх, соён гэгээрүүлэх ёстой. Түүхийн хичээлийг энд сургадаг байгаасай гэж бодож байна. Музейд сургалтын танхим, номын сан зэргийг байгуулна. Гадаадад байгаа Элчин сайдуудад тухайн оронд нь байгаа Их Эзэн хааны түүхтэй холбоотой үзмэр, дурсгалыг авчрах, эсвэл хуулбарыг авчрах үүрэг өгсөн" гэсэн юм. 

ШУУД ҮЗЭХ