Сургуульд орох зургаан настнуудыг ирэх сарын 3-наас бүртгэнэ

2020-2021 оны хичээлийн жилд нэгдүгээр ангид элсэгчдийн бүртгэл наймдугаар сарын 3-наас эхлэн цахимаар явагдана. Эцэг, эх, асран хамгаалагчид Parent.esis.edu.mn системд өөрийн мэйл хаягаараа нэвтэрч, хамран сургах тойргийнхоо сургуульдаа хүүхдээ элсүүлэх хүсэлт илгээж бүртгүүлэх аж. Цахим бүртгэл наймдугаар сарын 3-28-ныг хүртэлх хугацаанд үргэлжилнэ.

Оршин суугаа хаягнаасаа шилжсэн, бичиг баримтын зөрчилтэй бол наймдугаар сарын 24-28-ны өдрүүдэд ажлын цагаар тухайн амьдран сууж буй дүүрэгтээ, харьяаллын дагуу сургуулийн байр дээр очиж бүртгүүлэх юм байна.

Мөн 2020-2021 оны хичээлийн жилд Нийслэлийн төрийн өмчийн цэцэрлэгт шинээр элсэн орох 2018 онд төрсөн 2 нас болон 3-5 настай хүүхдийн элсэлтийн бүртгэл наймдугаар сарын 3-ны өдөр эхэлж, 25-ны өдөр дуусах аж. 

Одоогоор tsetserleg.ulaanbaatar.mn сайтад шинэчлэл хийж байгаа тул нэвтрэх боломжгүй байгаа юм байна.

Орон нутгийн сонгуультай холбогдуулан иргэний шилжилт хөдөлгөөн 2020.08.15-аас 2020.10.15 хүртэл зогсох тул шилжилт хөдөлгөөнөө дээрх хугацаанаас өмнө хийлгэхийг сануулж байна.

Учир нь, Цахим бүртгэл нь улсын бүртгэл дээрх бүртгэлтэй хаягийн дагуу цэцэрлэгт л хуваарилдаг юм.