Ялтан Т.Чимгээ өөрийнхөө БИЧЛЭГИЙГ НИЙТЭД ИЛ БОЛГОХЫГ хүсжээ

С.Зориг агсны амь насыг хөнөөсөн хэрэгт гурван шатны шүүхээс ял шийтгэгдсэн Т.Чимгээг эрүүдэн шүүсэн гэх бичлэг, нотлох баримтыг ил болгох тухай тогтоол баталсан талаар Хууль зүй, дотоод хэргийн сайд Х.Нямбаатар мэдээлсэн билээ.

Уг тогтоолын хүрээнд, Т.Чимгээг ухаангүй байх үед нь гар, хурууны хээг авч, нүцгэн зургийг нь авч буй бичлэгийг олон нийтэд ил болгоод байна. 

ХЗДХ-ийн сайд Х.Нямбаатар "Т.Чимгээ, Б.Содномдаржаа нарт холбогдох С.Зориг агсныг хөнөөсөн хэрэг нэгэнт хуулиар шийдэгдсэн шүүхийн шийдвэртэй. Энэ шүүхийн шийдвэрийг ЭХХШ тухай хуулийн дөрвөн үндэслэлээр хүчингүй болгож дахин хянан шийдвэрлэх ажиллагаа явуулдаг. Тухайлбал, Шүүх, прокурор, мөрдөгч, эрх бүхий албан тушаалтан эрх хэмжээгээ урвуулан ашигласан нь хуулийн хүрээнд хүчин төгөлдөр болсон нь шүүхийн шийдвэрээр тогтоогдсон бол гэдэг үндэслэл бий. Энэ үндэслэл тогтоогдвол прокурор эсэргүүцэл бичих боломжтой. Үүнд хүний эрх зөрчигдсөн, хилсээр хүмүүс 20 жилийн ял авсан байж болзошгүй үндэслэл, эрүүдэн шүүлт байгаа нь тогтоогдсон. 2014 оноос хойш Т.Чимгээг Ц.Амгаланбаатар нарын ял эдэлж буй хүмүүс дарамталж байсан. Өөр этгээд ч Т.Чимгээтэй байнга холбогдож, зөвлөгөө өгдөг байсан. Одоо ил болгож буй бичлэг дээр Т.Чимгээ согтууруулах ундаа маш бага тунгаар хэрэглээд, ухаангүй болмогц гар, хурууны нь хээг авч, нүцгэлэн зургийг нь авсан хууль бус үйлдлийг харуулна. Энэ бол ЭХХШ тухай хууль, гүйцэтгэх ажиллагааны тухай хууль ноцтой зөрчсөн үйлдэл" гэдгийг мэдээлэл хийхдээ онцолсон билээ. 

Т.Чимгээ, Б.Содномдаржаа, Б.Булган нарыг эрүүдэн шүүсэн байж болзошгүй үндэслэлээр тухайн үеийн Тагнуулын ерөнхий газрын дарга Б.Хурц, УЕП-ын орлогч Г.Эрдэнэбат нарын есөн хүнд эрүүгийн хэрэг үүсгэн шалгаж, хэргийг Төв аймгийн шүүхэд харьяаллын дагуу шилжүүлсэн бол дараа нь 2019 оны наймдугаар сарын 12-19-нд болсон анхан шатны шүүх хэргийг прокурорт буцаасан юм.

Эл хэрэг давах шатны болон Улсын дээд шүүхэд зургаан удаа очсон ч одоог хүртэл эцэслэн шийдэгдээгүй байгаа юм.
 

Ялтан Т.Чимгээ нь бичлэгийг ил болгох талаар Хууль зүй, дотоод хэргийн сайдад дараах өргөдлийг бичжээ.