Тэд хэлсэн үг, үйлдэлдээ УУЧЛАЛТ гуйжээ

Загвар өмсөгч, фитнесс модель гэх тодотголтой С.Эрдэнэцогтын "Urban talk" нэвтрүүлэгт оролцохдоо хэлсэн үг, хэллэг одоо ч олон нийтийн сүлжээнд шүүмжлэл дагуулсан хэвээр байна. Тэгвэл тухайн нэвтрүүлгийн хөтлөгч Х.Учрал болон оролцогч С.Эрдэнэцогт нар ард иргэдээсээ уучлал хүсэж, байр сууриа илэрхийлжээ.

Холбоотой мэдээ: ХАНДЛАГА I Хүчирхийллийг өөгшүүлсэн хүмүүсээс ГЭРЭЭГЭЭ ЦУЦАЛДАГ

Х.УЧРАЛ: ҮЗЭГЧДЭЭСЭЭ ДАХИН ДАХИН УУЧЛАЛ ХҮСЭЖ БАЙНА

"Urban talk" нэвтрүүлгийн хөтлөгч Х.Учрал "Eagle" телевизээр дамжуулж үзэгчдээсээ уучлал хүссэн байна. Тэрбээр "Тэр яригдаад байгаа ярилцлага дээр нь би байгаагүй байж таарсан. Гэхдээ би хяналт тал болон шууд цацах зүйл, шийдвэрийг гаргасан. Энэ үйлдэлдээ үзэгчдээсээ дахин дахин уучлал хүсэж байна. Цаашид ийм алдаа дахин гаргахгүй. Би бол эмэгтэйчүүд, хүүхдийн хүчирхийллийн асуудал дээр хатуу байр суурьтай байдаг. Тодорхой сувгуудаар цацаж байгаа ч гэсэн цаашид анхаарах ёстой нэг жишээг нь манай контент дохио өгсөн болов  уу гэж бодож байна. Бид анхаарах хэрэгтэй юм байна. Залуус, хүүхдүүд маш их үздэг. Ихэнх нь л өсвөр насныхан байгаа. Тиймээс энэ тал дээр илүү их анхаарах хэрэгтэй гэдгийг ойлголоо" хэмээн ярьжээ. 

С.ЭРДЭНЭЦОГТ: ОДОО ТЭГЭЭД ЯАХ ВЭ ДЭЭ, НЭГЭНТ БОЛЧИХСОН АСУУДАЛ

Харин загвар өмсөгч, фитнес модель С.Эрдэнэцогт өөрийн цахим хуудаснаа байр сууриа илэрхийлсэн байна. 

Тэрбээр "Хараал аймаар их хэлсэн нь ярьсан ярианы үнийг алдагдуулчихсан байна билээ. Үнэхээр тэр тал дээрээ маш их анхаарья гэж бодсон. Урьдны дугаарууд дээр тэгсхийгээд өнгөрдөг жижиг мааз ярианд хараал цухуйлгаад өнгөрдөг байсан бол тэр өдөр халамцуу баахан П, Г уншчихсан байна лээ. Тэрийгээ мэдээд би өөрөө миний хэсгүүдийг хасчих аа гэж гуйсан юм л даа. Одоо тэгээд яах вэ дээ, нэгэнт болчихсон асуудал" гэжээ.