"Капитрон" банкны ажилтанд хутга тулгаж, дээрэмдэхийг завдсан этгээдийг СААТУУЛЛАА

Хан-Уул дүүргийн 21 дүгээр хороо, Буянт-Ухаа 2 дугаар хорооллын 1042 дугаар байрны нэгдүгээр давхарт байрлах "Капитрон" банкны тооцооны төвд энэ сарын сарын 9-ний өдрийн 16:00 цагийн орчимд банкны ажилтан Г.Т-г ганцаараа ажиллаж байх үед үл таних 40-50 орчим насны этгээд гаднаас орж ирэн, хутга тулган ноцолдож, дээрэмдэхийг завдсан хэрэг үйлдэгджээ.

Цагдаагийн алба хаагчид хэргийг үйлдсэн этгээдийг тасралтгүй эрэн сурвалжилж, мөрдөн шалгах ажиллагаа явуулсны дүнд өчигдөр буюу есдүгээр сарын 26-ны өдөр уг хэргийг үйлдсэн байж болзошгүй 46 настай, эрэгтэй Э гэгчийг урьдчилсан байдлаар тогтоож баривчлан, таслан сэргийлэх хойшлуулшгүй арга хэмжээ авч, Монгол Улсын Эрүүгийн хуулийн 17.2 зүйлийн 3 дахь хэсгийн 3.2-т зааснаар Хэрэг бүртгэлтийн хэрэг үүсгэж Хан-уул дүүрэг дэх цагдаагийн газрын Хоёрдугаар хэлтэст мөрдөн шалгах ажиллагааг үргэлжлүүлэн явуулж байна гэж Цагдаагийн ерөнхий газрын хэвлэл мэдээллийн төвөөс мэдээллээ.