ЭХЯ: ОХУ-д болсон аваарын үеэр Монголын эрчим хүчний систем бүрэн бие даан ажиллалаа 

Э.Мөнхжин | Zindaa.mn
2022 оны 06 сарын 24

ОХУ-д болсон аваарын үеэр Монголын эрчим хүчний систем бүрэн биеэ даан ажиллалаа гэж ЭХЯ-наас мэдээллээ.

Тодруулбал, өчигдөр буюу зургаадугаар сарын 23-ны 14:41 цагт  ОХУ-ын Буриадын Эрчим хүчний системийн  Галуут нуурын цахилгаан станцын дамжуулах сүлжээний трансформаторт гал гарсны улмаас ажиллаж  байсан 200 МВт-ын 3 блок аваараар зогссоноос Буриадын 34 суурин газрууд болон Улаан Үүд хот орчмын зарим хэрэглэгчдийн цахилгаан эрчим хүчийг хязгаарласан. 

Энэ тасралтын улмаас Монголын Эрчим хүчний систем, Буриадын Эрчим хүчний системийн Селендум орчмын  хэрэглээний хамт тусдаа гарсан ба  системийн давтамж f=49.1 Гц хүрч системийн аваари эсэргүүцэх автомат буюу давтамжаар  ачаалал хөнгөлөх автомат төхөөрөмжийн үйлчлэлээр ЦДҮС-ийн Говийн бүсийн салбарт 3 МВт, Улаанбаатарын салбарт  58,5 МВт, Төвийн бүсийн салбарт 1,2 МВт, Хангайн бүсийн салбарт 5,1 МВт, Зүүн өмнөд бүсэд 2 МВт орчим хэрэглэгчдийн цахилгаан эрчим хүчийг тасалж системийн аваараас сэргийлжээ. 

Дотоодын эх үүсвэрүүдэд ачаалал нэмж системийн давтамжийг 49,7 -49,9 Гц-ээр барьж ажилласан ба ОХУ талаас схем холболтоо сэргээсний дараа  15:26 цагт 220 кВ-ын агаарын шугам 258-г залгаж, ОХУ-н эрчим хүчний системтэй зэрэгцээ ажиллагаанд орж улмаар  15:34 цагт тасархай  хэрэглэгчдийг залгав. 

Гэсэн хэдий ч ОХУ-ын Буриадын ЭХС-ийн  Галуут нуурын цахилгаан станцын үндсэн тоноглолын үйл ажиллагаа бүрэн сэргээгүй байгаагаас ОХУ-ын ЭХС-д аваарийн байдалтай, ОХУ-ын Нэгдсэн системээс Буриадын ЭХС руу өгөх шугамын урсгал зөвшөөрөгдөх хэмжээнээс  хэтэрсэн гэсэн шалтгаанаар  Монголын ЭХС руу өгөх ЦЭХ-ний хэмжээг 10МВт чадлаас хэтрүүлэхгүй байхаар Буриадын диспетчерээс шийдвэр өгсөн тул  16:30 цагт хэрэглэгч хязгаарлах хөтөлбөрийн дагуу ТБС-т P=15.3 МВт, ХБС-т P=13.9 МВт-н хэрэглэгч хязгаарлаж ажиллалаа.

ОХУ-ын Буриадын ЭХС-ийн  Галуут нуурын цахилгаан станцын 200 МВт-ын 2 блокыг ажилд залгасан ба 19:44 цагт хязгаарласан хэрэглэгчдийг буцаан залгаснаар Монголын эрчим хүчний систем хэвийн горим ажиллагаандаа шилжин ажиллалаа.

Энэхүү нөхцөл байдалд дүгнэлт хийж, цаашид болзошгүй аваараас урьдчилан сэргийлж сонор сэрэмжтэй ажиллах талаар арга хэмжээ авч ажиллахыг холбогдох байгууллагуудад Эрчим хүчний сайд Н.Тавинбэх  үүрэг болголоо гэв.

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Занга(202.179.25.45) 23 цагийн өмнө

Бэхээр чимхлүүр ажил хийсэн байна. Монголд 50 бэхээр гүйцэтнэсэн бололтой.

0  |  0
Зочин(202.21.108.202) 2022 оны 06 сарын 24

Үүрэг болголоо ч гэх шиг. Цалингаа голж байвал явуул. Гарч л байдаг ордог л байдаг гээд хээв нэг хариулчихаад цалин нэмэхээс харамласан , таны өнөөх тоохгүй хаясан мэргэжлийн хэдхэн ажилчид чинь энэ хүнд үеийг нэр төртэй авч гарсан Шүү ЭРХЭМ САЙД АА!!!

0  |  1
Top