Ж.Соронзонгоос салж чадах уу!

Сүүлийн хэд хоног Монгол-Оросын хамтарсан III сургуулийн захирал Ж.Соронзонтой холбоотой мэдээлэл олны анхаарлын төвд байсан гэж хэлж болно. Харин тэрбээр сэтгүүлчдэд мэдээлэл хийх үеэрээ сэтгүүлч С.Будрагчааг эцэггүй өссөн, ядуу тарчиг амьдралтай, ээж нь архичин зэргээр хэлсэн. Түүний эл мэдэгдлийн хариуд МСНЭ-ээс мэдэгдэл гаргаж, албан ёсоор уучлалт гуйхыг шаардсан. Тэгвэл Ж.Соронзон захирлыг үүрэгт ажлаас нь халах тушаалыг өчигдөр өглөө Боловсрол, Шинжлэх ухааны сайд Л.Энх-Амгалан гаргалаа. Тушаалыг гаргахдаа Монгол Улсын холбогдох хуулиуд болон, Монгол Оросын хамтарсан сургуулийн удирдлага, санхүүгийн үйл ажиллагаанд хийсэн хяналт шинжилгээний тайлан дүгнэлтийг үндэслэл болгосон гэдгээ ч салбарын сайд нь онцолсон юм.

Тэгвэл энэ тухай ЗГХЭГ-ын дарга Д.Амарбаясгалан хэвлэлд өгсөн мэдээлэлдээ “Монгол Улсын иргэн Үндсэн хуулиар олгогдсон үндсэн эрхээ бүрэн дүүрэн эдэлдэг байх ёстой. Ж.Соронзон захирал хүмүүнлэг иргэний ардчилсан нийгмийг цогцлоох, гарал үүслээр нь ялгаварлан гадуурхахгүй байх гэдэг үзэл санааны эсрэг мэдэгдэл хийсэн учраас ажлаас нь халах шийдвэрийг гаргаж байгаа юм” хэмээн тайлбарласан.

Гэтэл энд нэг зүйлийг сануулахад Ж.Соронзон захирал хийсэн мэдэгдэлдээ “Оросоос асууж байж шийддэг” хэмээн томорсон. Харин Д.Амарбаясгалан сайд Монгол Улсын нутаг дэвсгэр дээр үйл ажиллагаа явуулж байгаа учраас Үндсэн хууль болоод бусад хуулийг баримталж ажиллах ёстой гэдгийг тодорхой хэлнэ лээ. Гэхдээ энд нэг зүйлийг сануулах нь зүйтэй. Тус сургуулийн сурагчид хоолны хордлогод орсон гэдэг асуудлаар тухайн үед салбарын сайдаар ажиллаж байсан Ё.Отгонбаяр Ж.Соронзон захирлыг ажлаас нь чөлөөлж байлаа. Гэвч тэрээр Захиргааны хэргийн шүүхэд хандаж, улмаар шүүх сургуулийн захирлын талд шийдвэр гаргаж, улмаар ажилдаа эргэн орсон юм. Үүний дараахан Ё.Отгонбаярын эхнэрийн дансаар их хэмжээний мөнгө орсон гэдэг мэдээлэл олон нийтэд гарч, түүнээс хойш энэ хүний улс төрийн карьер уруудсаар өдгөө бараг бүрэн дууссан гэж хэлж болно.

Ж.Соронзонгийн нөхөр нь Шүүхийн ерөнхий зөвлөлийн даргаар ажиллаж байсан Н.Лүндэндорж гэхээр тухайн үедээ арга ч үгүй биз. Гэтэл тушаал гаргаж ажлаас нь халсан сайдын улс төрийг дуусгасан, өдгөө олон нийтэд гаргаж байгаа авир, туслах эмэгтэйгээ хэвлэл мэдээллийн хэрэгслээр бүлтэлзүүлж байгаа зэргээс харахад асар том артай, нөлөө бүхий улстөрчдийн хамгаалалтад байдаг гэж хардаж болохоор байна. Ер нь бол ийм асуудал өнөөдөр ч гэсэн давтагдахгүй гэх баталгаагүй. Адаглаад л салбарын сайдын тушаалыг шүүхээс хүчингүй болгож мэднэ. Учир нь тухайн үед шүүхэд хандахдаа намайг яам биш нийслэл халах эсэхийг шийдэх ёстой гэсэн байдаг. Тийм учраас л энэ удаад ч гэсэн сайдын тушаал хана мөргөж мэдэх юм.

Дээрээс нь Ж.Соронзон захиралтай холбоотой асуудал дэгдэх бүрийд эцэг, эхийн төлөөлөл яамны үүдэнд жагсаж байдаг. Нэр нөлөө бүхий жүжигчид ч байж л байдаг. Энэ удаад ч энэ бүхэн зургийн дагуу өрнөлөө. Өчигдөр жагссан эцэг эхчүүд “Ж.Соронзон захирлыг халчихаар багш, хүүхдүүд сургуулиасаа гарч магадгүй” гэж байхав дээ. Энэ удаад ажлаас нь халсан тушаалыг ямар ч байсан тус сургуулийн ТУЗ-ын дарга, НИТХ-ын дарга Ж.Батбаясгаланд ЗГХЭГ-ын дарга хүлээлгэн өгөөд “Оросын талтайгаа учраа ол” гэж байна лээ. Харин үнэхээр салбарын сайдын тушаалаар бус нийслэлээс халах, эсэхийг нь шийддэг нь үнэн бол Ж.Соронзонгоос салахын тулд нийслэл шийдвэрээ гаргах хэрэгтэй болно.

Ер нь тусгаар тогтносон Монгол Улсад үйл ажиллагаа явуулж байгаа нэг сургуулийн захирлыг халах эсэхийг оросуудаас асуудаг, зөвшөөрөл авдаг байж таарахгүй учраас Засгийн газар, салбарын яам, нийслэл гээд холбогдох төрийн байгууллагууд гаргасан шийдвэрээ хамгаалж үлдэх шаардлага гарна. Тэгж байж л яс үндэс, гарал угсаагаар нь ялгаварлан гадуурхаж, ядуу зүдүүгээр нь дээрэлхэж суудаг Соронзонгоосоо салж чадна. 

Эх сурвалж: Өглөөний сонин